Chiroyli qomat sari olg`a! Fitness-instruktor Ozoda Davronovadan 7 maslahat

1.    Qorindagi ortiqcha yog`lardan xalos bo`lish uchun nafaqat parhez qilish, balki uy sharoitida mashqlar bajarish ham kerak. Ikkalasini birgalikda olib borsangiz, istalgan natijaga erisha olasiz.

2.    Belni xipcha qiluvchi, qorindagi yog`lardan xalos etuvchi eng yaxshi mashq,  bu — o`tirib-turish. Bu mashqni faol ravishda boshlash uchun avval butun tanani bunga tayyorlab borish zarur. Buning uchun hafta davomida har tong ozgina vaqt mashq qiling, tanani chiniqtiring.

3.    Bir haftadan so`ng o`tirib-turish mashqiga bemalol o`tsangiz ham bo`ladi. Mashqni orada 3 marta dam olgan holda 15 marta bajarishdan boshlang. Jarayonni musiqa jo`rligida amalga oshirsangiz, charchoq nimaligini bilmaysiz. Har 3 kunda mashq sonini 5 taga ko`paytirib boring.

4.    Mashqlar bilan birgalikda parhezni boshlang. Ochlik e`lon qilishingizga hojat yo`q, shunchaki kunlik taomnomangizni to`g`ri tuzing.

5.    Har kunlik rasioningizda quyidagi mahsulotlar bo`lishi shart: qaynatilgan go`sht, sabzavotlar, mevalar, yog`siz sut mahsulotlari, guruch, grechixa, yog`siz baliq go`shti.

6.    5-maslahatda sanalgan mahsulotlarni istaganingizcha eyishingiz mumkin, faqat kechqurun o`zingizni tiying. Shirinliklardan esa Yangi yilgacha voz kechganingiz ma`qul.

7.    Yanada tez va ko`proq samaraga erishish uchun haftada bir marta suzish havzasiga borib, kamida yarim kilometrga suzing. Shuningdek, oddiy yumshatuvchi krem bilan qorinni uqalang, bunda yog`lar harakatga tushib, erishi osonlashadi.