Eslab qoling, yuz terisidagi dog`larni ketkazish uchun qulay vaqt bu – ertalabki soat 10:00 dan 12:00 gacha; tushlikdan so`ng soat 16:00 dan 18:00 gacha va kechki payt soat 22-23 oraliqlari.
Petrushka
Bir bog` barra petrushka ko`katini go`shtqiymalagichdan o`tkazib, hosil bo`lgan sharbati bilan birga namlangan yuz terisiga surting. 15 daqiqadan so`ng iliq suvda chayib olasiz. Niqob ta`sirini oshirish uchun oziqlantiruvchi krem surtishni unutmang.
Sut va ko`kat
Yarim piyola sutga shuncha miqdorda petrushka ko`kati sharbatini qo`shing. Masalliqlarni yaxshilab aralashtirgach, yuzdagi dog` yoki sepkil ustidan surtib chiqing. 10 daqiqadan so`ng iliq suvda chayib oling.
Bodom
2 osh qoshiq bodom mag`zi ustidan yarim stakan qaynoq suvni quying-da, 5 daqiqaga qoldiring. So`ngra suvini to`kib tashlab, bodomni go`shtqiymalagichdan o`tkazing. Hosil bo`lgan aralashmaga yarimta limon sharbati va 2 osh qoshiq qaynatilgan suv qo`shib, aralashtiring. Niqobni yuz terisiga tekis surtib, 15 daqiqaga qoldiring. Avval iliq, so`ng sovuq suvda chayib oling.
Bodring
Bitta bodringni qirg`ichdan o`tkazing. Hosil bo`lgan sharbati bilan birga yuzingizga surtib, 15 daqiqa shu holatda qoling. Niqobni tozalashda avval paxta bilan bir sidra artib, so`ngra iliq suvda chaying.
Kartoshka va o`simlik yog`i
Bitta kartoshkani archib, qirg`ichning mayda tishidan o`tkazing. Sabzavot bo`tqasiga yarim choy qoshiq o`simlik yog`ini qo`shing. Aralashmani yuzdagi dog` yoki sepkil ustidan tekis surtib, 15-18 daqiqaga qoldiring. Niqobni yuvib olgach, yuz terisini namlantiruvchi krem surting.
Suli yormasi va sut
1 osh qoshiq suli yormasini yarim stakan iliq sut bilan aralashtiring. Hosil bo`lgan bo`tqani yaxshilab, ezg`ilang. So`ngra yuzingizga surtib oling. Suli yormasi tarkibidagi foydali moddalar teri kataklarini tozalab, tekislaydi.
Ko`k choy
Bu yuz terisi rangini oqartirishning eng oson usullaridan biri. Suyuq damlangan ko`k choyga paxtani xo`llab, yuzingizni arting. Bir marotaba artgach, teri qurimasidan yana bir marta muolajani takrorlang.
