— 4 oy avval to`yim bo`ldi. Yoshim o`tib borayotgani uchun yaqinlarimning qistovi bilan o`zim tanimagan, bilmagan insonga turmushga chiqdim. To`g`risi, to`yim qanchalik tez bo`lib ketganini tushunolmay ham qoldim. Erim avval uylangan, aytishicha, xotinini juda yaxshi ko`rgan-u, sevgan ayolining xiyonatiga chiday olmay ajrashishga majbur bo`lgan ekan. Nazarimda, hanuzgacha o`sha ayolni sevadigandek. Chunki uning kiyim kechaklariyu buyumlarini hamon asrab yuradi. Bu insonga turmushga chiqishdan avval munosabat o`rnatish mushkul bo`lishini tushunganman, biroq avvalgi xotiniga bu qadar bog`lanib qolganiligini bilmagan ekanman. Kiyimlarini yuvish uchun olsam, buyumlariga tegmaslikni buyuradi, yolg`iz qolganimizda gaplashib o`tirishni istayman, ne istihola bilan og`iz juftlasam, «Menga erkalanma» deb urushib beradi. Bularning barini xiyonatning asorati sifatida qabul qilishim mumkin edi. Biroq homilador ekanimni eshitgan erimning kayfiyati tushib, asabiylasha boshladi. Bir muddat o`tgach, bu bolani tug`ishimga qarshi ekanligini ma`lum qildi. Homilani oldirib tashlashimni istayapti. Nima qilishni bilmay hayronman. Menga ko`ngli yo`q erkakdan farzand ko`rishim to`g`rimi? Maslahat bering...
Zulxumor, 27 yosh, Buxoro viloyati.
Qaynonajon: — Qiyin ahvoldasiz, tushunamiz. Ammo siz xotirjam bo`ling, bu kunlar o`tadi. Xiyonat tufayli ajrashgan ekan, avvalgi xotini bilan yarashmaydi. Erkaklar xiyonatni kechirishi qiyin. Faqat ular yaxshi ko`rgan insonidan sadoqat ko`rmagach, boshqa ayollarga ham ishonmay qo`yishadi-da. Shu bois g`amxo`rligingiz soxtadek, makkorlikdek tuyulaveradi. Uni tushunishga harakat qiling. Dili yaralangan kishining aqli, tushunchasi va vujudi sog`ayishi, yangi hayotga qadam qo`yishi uchun vaqt kerak. Va albatta, sizdan mehribonlik, samimiylik, ruhiy holati va kayfiyatiga qarab muomala qilish talab etiladi. Juda ehtiyot bo`lish shart. Jahl ustida aytilgan so`zni, befarqlikni ko`ngilga olmay, chiroyli muomalada davom etish kerak. Qalbi siniq insonning yarasiga malham sifatida sizni tanlab kelin qilishgan, qizim. Shunday og`ir ahvolida unga sadoqatli hamroh bo`ling. Har bir yaxshilikdan so`ng bir sinovli kun bor, yomonlik va xiyonatdan keyin esa, albatta, yaxshilik keladi. Bu xonadonga siz yaxshilik farishtasi yanglig` kelganingiz rost bo`lsin. O`zingizni qo`lga oling. Vujudingizda dilband farzand o`sayapti. Shuning o`zi katta baxt. Ishonamizki, bolaning eson-omon tug`ilishi ham alamlarning unutilishiga sabab bo`ladi, hayotingizning baxtli onlari shu go`dak yig`isidan boshlanadi.
Shahnoza Halilova, ruhshunos: — Ko`ngil ishi qiyin masala. Ammo baxtga erishish uchun kurashish kerak. Totuv turmushni ota-onangiz ham, yaqinlaringiz va hatto eringiz ham sizga taqdim eta olmaydi. Har bir inson o`z quvonchi uchun o`zi harakat qilishi lozim. Avval ko`nglingizdagi «Unga avvaligi xotinidek bo`la olmadim, munosib ayol emasman, meni yaxshi ko`rmaydi...» kabi xayollarni chetga surib, o`zingizga nisbatan ishonchingizni oshiring. Bilasiz, bu dunyoda har bir insonga bir sinov beriladi. Eringizning e`tiborsizligini sinov deb qabul qiling va e`tiborga erishish uchun harakat qiling. Ishni esa ichki qo`rquvlarni engishdan boshlang. «Olma pish — og`zimga tush», deb o`tirsangiz, ko`z yoshingizni oqizib qolaverasiz. Oilangizni saqlab qolishga harakat qilsangiz, albatta, niyatingizga etasiz.
Saodat Ochilova yozib oldi.
