​SSV: Toshkent shahridagi tibbiyot kollejlarining bor-yo`g`i 33 foizi ish bilan ta`minlangan

Bugun mamlakatimizda yoshlarni o`zi tanlagan sohaning malakali mutaxassisi bo`lib etishishi uchun tizimda izchil islohotlar o`tkazilmoqda. Ta`lim muassasalarining moddiy-texnik bazasi zamon talabiga to`liq javob berish uchun amaliy ishlar qilinmoqda. Ammo sohani o`rganishlar yurtimizda kasb-hunar kollejlari o`quvchi qizlarining egallagan kasbi bo`yicha ishga joylashtirishda o`z echimini kutayotgan masalalar borligini ko`rsatmoqda. Ayniqsa, bu jihat tibbiyot kollejlari bitiruvchilari o`rtasida yanada yaqqol ko`zga tashlanmoqda.

Misol uchun, 2015-2016 o`quv yilida Toshkent shahridagi tibbiyot kollejlarini 8274 nafar o`quvchi bitirgan bo`lsa, ularning bor-yo`g`i 33 foizi o`z mutaxassisligi bo`yicha ish bilan ta`minlangan, xolos.

Shu sababli,o`tgan yili mamlakatimiz bo`yicha tibbiyot kollejlariga 35 ming nafardan ziyod o`quvchi qabul qilingan bo`lsa, joriy yilda qabul kvotasi 7 mingga qisqartirilib, 28 ming nafarga yaqin o`quvchi qabul qilinishi rejalashtirilgan.

Ma`lumki, mamlakatimiz Prezidentining 2017 yil 14 martdagi “O`rta maxsus, kasb-hunar ta`limi muassasalari faoliyatini takomillashtirish chora-tadbirlari to`g`risida”gi qarori asosida mehnat bozoridagi real ish o`rinlari va akademik liseylarning sifat ko`rsatkichi tahlil qilingan holda 18 ta akademik lisey kasb-hunar kollejlariga aylantirildi. 4 ta akademik liseyda o`quvchilar qabuli to`xtatildi.

Kelgusida ham hududlarning real iqtisodiyot tarmoqlarida barcha sohalardagi kabi o`rta maxsus ma`lumotli tibbiyot kadrlariga bo`lgan ehtiyojdan kelib chiqqan holda malakali kadrlar tayyorlash tizimi isloh qilinib, yildan-yilga bosqichma-bosqich takomillashtirilib boriladi.