Xitoy Bosh vaziri Islom Karimov qabulida bo`ldi

28 noyabr kuni Ko`ksaroyda O`zbekiston Respublikasi Prezidenti Islom Karimov mamlakatimizga rasmiy tashrif bilan kelgan Xitoy Xalq Respublikasi Davlat kengashi Bosh vaziri Li Kesyanni qabul qildi.

Davlatimiz rahbari mehmonni yurtimizga tashrifi bilan qutlar ekan, uning Xitoy Davlat kengashi Bosh vaziri sifatida O`zbekistonga ilk rasmiy tashrifi XXR Raisi Si Szinpinning shu yil sentyabr oyida mamlakatimizga davlat tashrifining mantiqiy davomi ekanini ta`kidladi. Mazkur davlat tashrifi yakunlari davlatlarimiz o`rtasidagi hamkorlikni mustahkamlash va rivojlantirishga xizmat qilishini, mamlakatlarimiz va xalqlarimiz o`rtasidagi strategik sheriklik munosabatlarini izchil kengaytirishga yangi sur`at bag`ishlaganini qayd etdi, deya xabar beradi [url=http://uza.uz/oz/]O`zA.

Uchrashuvda ikki tomonlama hamkorlik deyarli barcha yo`nalishlar – siyosiy, savdo-iqtisodiy, sarmoyaviy, madaniy-gumanitar va boshqa sohalarda izchillik bilan jadal rivojlanayotgani ta`kidlandi.

Kuni kecha Toshkentda bo`lib o`tgan ikki davlat ishbilarmon doiralarining biznes-forumi o`zaro manfaatli aloqalarni yanada kengaytirish, yangi, avvalambor, yuqori texnologiyalar sohasida faoliyat ko`rsatadigan qo`shma korxonalar tashkil etishdan tomonlar birday manfaatdor ekanligini yaqqol tasdiqladi.

2013 yilning 9 oyi yakunlariga ko`ra, ikki tomonlama tovar ayirboshlash hajmi 3,5 milliard AQSh dollaridan oshdi. Bu butun 2012 yildagidan ancha ko`pdir.

O`zbekistonda Xitoy kapitali ishtirokida tuzilgan 488 qo`shma korxona muvaffaqiyatli faoliyat yuritmoqda. 2002 yildan buyon Xitoy sarmoyasi ishtirokida umumiy qiymati 6,75 milliard dollarlik bir nechta loyiha amalga oshirilmoqda.

2012 yildan Xitoyga O`zbekiston tabiiy gazi muntazam etkazib berilmoqda. Ayni paytda “O`zbekiston-Xitoy” gaz quvurining uchinchi liniyasi barpo etilib, to`rtinchi liniyasi loyihalashtirilmoqda. Ularning ishga tushirilishi O`rta Osiyodan XXRga tabiiy gaz eksporti va tranzitini kengaytirish imkonini beradi.

Suhbat chog`ida O`zbekiston va Xitoy hamkorligiga oid boshqa masalalar yuzasidan ham fikr almashildi.

Li Kesyan samimiy qabul, o`zaro hamkorlikning dolzarb masalalari, tomonlarni qiziqtirgan mintaqaviy va xalqaro muammolarni atroflicha muhokama etish imkoniyati yaratilgani uchun Prezidentimizga chuqur minnatdorlik bildirdi.

Xitoy Bosh vaziri Islom Karimov qabulida bo`ldi

Bizni ijtimoiy tarmoqlarda kuzatib boring

Boshqa yangiliklar