Shu
kunlarda O`zbekiston Tasviriy san`at galereyasida bo`lib o`tayotgan
“An`analardan ilhomlangan san`at” ko`rgazmasida mamlakatimizdagi
muzeylarda saqlanayotgan eng sara tarixiy liboslar, zargarlik va kashta
namunalari namoyish etilmoqda.
Xususan, ko`rgazmaga O`zbekiston Davlat san`at, I. V. Saviskiy nomidagi
Qoraqolpoq Davlat san`at, Qoraqalpoq Davlat, Farg`ona, Samarqand
o`lkashunoslik muzeylari, Samarqand Davlat, “Ichan-Qal`a” Davlat, Buxoro
Davlat me`morlik-badiiy muzey-qo`riqxonalaridan eng nodir namunalar olib
kelingan.
Ma`lumki, qadimiy liboslar madaniyatimiz va an`analarimizning ajralmas
qismi bo`lib, ko`p asrlik tariximizni o`zida aks ettiradi. Ular har bir
davrning o`ziga xos jihatlari, urf-odatlari va kiyinish uslubidan darak
beradi. O`zbekistonning har bir hududining bir-biriga o`xshamas maktablari
va yo`nalishlarini namoyon etadi. O`z navbatida, bu kabi nodir tarixiy
liboslar va zargarlik buyumlari ajdodlarimizning yashash tarzi, ijtimoiy
kelib chiqishi, o`sha davr ijtimoiy-siyosiy hayotidan ham so`zlaydi. Ular
haqida keng ma`lumotga ega bo`lish tariximizga bo`lgan hurmat ifodasidir.
Ko`rgazmani tashkil etilishidan asosiy maqsad ham tarixiy an`analarimiz,
boy madaniyatimizni keng jamoatchilik e`tiboriga havola etish, yosh avlodni
boy ma`naviy merosimiz bilan yaqindan tanishtirish va ularda milliy
qadriyatlarimizga hurmat va e`zoz hissini shaklantirishdir.
Ma`lumot o`rnida aytib o`tamiz, O`zbekistonning eng qadimiy liboslarini
qamrab olgan bunday ko`rgazma mamlakatimizda ilk marotaba o`tkazilmoqda.
Ko`rgazma 2017 yil 15 dekabrdan 2018 yilning 9 yanvariga qadar davom etadi