Janubiy Koreya sohillarida halokatga uchragan kemadan 338 nafar yo`lovchi qutqarib olindi. Bu haqda Reyter axborot agentligi xabar bermoqda.
ITAR-TASS axborot agentligining xabar qilishicha, kema bortida 450 nafar yo`lovchi hamda ekipaj a`zolari bo`lgan. Hozirda qutqaruv ishlari olib borilmoqda.
Yo`lovchilardan 320 nafari maktab o`quvchilaridir. Ular Chejudo oroliga sayyohat uchun yo`l olishgan edi. Sohil qo`riqlash xizmati odamlarni qutqarish uchun voqea joyiga vertolyot hamda patrul katerlarini yuborgan.
Kema Inchxon portini seshanba kuni tark etgan va bugun Chejudo oroliga kelishi kerak edi. Yo`lovchi kema mahalliy vaqt bilan 08:58 da halokat haqida signal jo`natgan. Hozirda kema Penpundo orolidan 20 km uzoqlikda bo`lib turibdi.
10:00. So`nggi ma`lumotlarga ko`ra, Janubiy Koreya respublikasi prezidenti Pak Kin Xe barcha kuch va vositalarni halokatga uchragan kema yo`lovchilari va ekipaj a`zolarini qutqarishga jalb qilishni buyurdi. Renxap nashrining xabar berishicha, hozirga kelib voqea joyida bir kishining jasadi topilgan.
11:10. RIA axborot agentligining xabar qilishicha, halokatga uchragan kemaning 370 nafar yo`lovchisi qutqarilgan, 3 kishining jasadi topilgan, 107 kishining taqdiri esa noma`lumligicha qolmoqda.
12:38. Janubiy Koreya hukumati kema ichida yo`lovchilar qolib ketgan bo`lishi mumkinligidan havotirda, deya yozadi RIA axborot agentligi.
Hozirgi vaqtga kelib, kemadan 368 kishi, shu qatorda 324 nafar maktab o`quvchisi va 14 nafar o`qituvchi qutqarib olindi. Qolgan 109 kishining taqdiri noma`lum. Renxap axborot agentligi 2 kishi halok bo`lgani haqida xabar bergan, Sky News telekanali esa 3 kishi halok bo`lganini aytmoqda.
KBS telekanalining xabar qilshicha, kema suv osti qoyalari bilan to`qnashib ketgan bo`lishi mumkin.
16:05. Halokatga uchragan kemaning bedarak yo`qolgan yo`lovchilari soni avval xabar berilganidan ko`proq bo`lib chiqdi.
So`nggi ma`lumotlarga ko`ra, qutqaruvchilar 368 emas, balki faqat 164 kishi qutqarib olingan. Bedarak yo`qolganlar soni esa 109 emas, balki 293 kishini tashkil etmoqda. Kema bortida umumiy 459 nafar yo`lovchi hamda ekipaj a`zolari bo`lgan. Ulardan 324 nafari sayyohatga chiqqan maktab o`quvchilaridir.