Rossiyaning MTS uyali aloqa operatori O`zbekiston hukumati bilan mamlakatda o`z faoliyatini yana tiklash to`g`risida deyarli kelishib oldi.
Bundan tashqari MTS mahalliy kompaniya ulushidan O`zbekistonga ham berishi mumkin. RIA agentligining xabar qilishicha, bu haqda MTSni nazorat qiluvchi Sistema kompaniyasi rahbari va egasi Vladimir Evtushenkov jurnalistlarga ma`lum qilgan.
“Biz barcha kelishuvlarga erishdik, faqatgina amalga oshirsa bo`ladigan yana bitta shart qoldi. Ular qaytishimizni juda ham istashmoqda. Kelisha olsak, shu yili qaytamiz,-deydi Evtushenkov.
Eslatib o`tamiz, 2012 yilning iyul oyida MTSning O`zbekistondagi sho``basi Uzdunrobita operatorining lisenziyasi qaytarib olingan edi. O`shanda kompaniyaga 600 mln AQSh dollar miqdorida da`volar qo`yilgan, operator rahbariyatiga nisbatan esa jinoiy ish ochilgan edi. Ushbu jarimani to`lay olmaslik munosabati bilan 2013 yilning yanvarida "Uzdunrobita" bankrot bo`lgani haqida ma`lum qilgan.
MTSning O`zbekistonga qaytish muddati aniq ma`lum qilinmagan.
