Buni tajribali marhamatlik tadbirkor o`z faoliyati davomida isbotladi.
Mamlakatimizda tadbirkorlik faoliyatini rivojlantirishga qaratilayotgan e`tibor sohada keng imkoniyatlarni ochmoqda.
Bu, o`z navbatida, yangi loyihalar va ishlanmalarni amaliyotga joriy qilish, xalqimizning turmush darajasi yuksaltirishga xizmat qilmoqda.
Ana shunday e`tibordan unumli foydalanayotgan Marhamat tumanilik tadbirkorlardan biri Oybek Ashurovdir.
U tashkil etgan “Vodiy hamkor agrofirma” mas`uliyati cheklangan jamiyatida ayni paytda 450 bosh qo`y, 500 bosh echki parvarishlanmoqda. Yaqin orada parrandachilik, asalarichilik, baliqchilikni ham yo`lga qo`yish rejalashtirilgan.
— 2016 yilda quyonchilikka asos solgan edik, — deydi MChJ texnologi Dilmurodjon Ashurov. — Hisob-kitob qilib ko`rsak, bitta qo`yga sarflangan harajatni quyonga sarflasangiz olti oy muddat ichida to`rt barobar ko`p daromad keltirar ekan. Buni amalda sinab ko`rish uchun Italiya hamda Fransiyadan 115 bosh “Kaliforniya”, “Yangi zeland”, “Flander” hamda “Reks” zotli quyonlarni olib keldik. Natijada 2017 yilning o`zida 3,5 ming bosh quyon tarqatishga erishdik.
Xalqaro tajriba shuni ko`rsatmoqdaki, agrar tarmoqda quyonchilik ham serdaromad yo`nalish hisoblanadi. Nega deganda, avvalo, uning go`shti parhezbop.
Yungi esa sifatli va issiqlikni saqlaydi. Qolaversa, yaxshi parvarish qilinsa, ko`p va tez ko`payadi. Eng muhimi, boqishda oz harajat talab qilinadi. Masalan, bitta quyon yil davomida 5-6 marta bolalashini inobatga olsak, demak, undan bir yilda 50-60 ta bola olish mumkin. Bu esa 70-80 kg. go`sht va kamida 50 dona teri demakdir.
Ushbu misollarning o`ziyoq, respublikamizda quyonchilikni yana rivojlantirish qanchalik istiqbolli ekanligini ko`rsatmoqda.
“Vodiy hamkor agrofirma” MChJ ana shundan kelib quyonchilikni viloyatda yana taraqqiy ettirish payida bo`lishmoqda. Jamiyat tomonidan shu yil boshidan bo`yon 150 ta fermer xo`jaligi va 200 dan ortiq oilalarga quyon etkazib berildi.
Bundan tashqari, quyon go`shtini qadoqlash, terisini qayta ishlash loyihalari ham ishlab chiqilib, Rossiyadan 50 ming AQSh dollari qiymatidagi texnologik liniya olib kelindi. Bu yaqin orada terini qayta ishlash korxonasi ish boshlaydi, deganidir. Natijada yiliga 150 ming AQSh dollarilik teri xom ashyosi Koreya Respublikasiga eksport qilinadi.
E`tiborlisi, viloyat hokimligi yaqinda “Vodiy hamkor agrofirma” uchun qo`shimcha 35 gektar er maydoni ajratdi. Demak, omuxta em ham MChJning o`zida tayyorlanadi va mahsulot tannarxi yanada arzon bo`ladi.
Manba "Xalq so`zi"
