Yaponiya Rossiyaga norozilik bildirdi

Bugun Tokioda o`tkazilgan matbuot anjumanida Yaponiya Vazirlar Mahkamasi bosh kotibi Yosixide Suga Kuril orollarida joylashtirilgan RF Sharqiy harbiy okrugi o`quv-tayyorgarlik majmualarida nazorat tekshiruvi doirasida o`tkazilayotgan Tinch okeani floti aviasiya va kemalarining keng ko`lamli o`quv-mashg`ulotlari uchun Yaponiya Rossiyaga norozilik bildirganini ma`lum qilgan.

"Biz diplomatik kanallar orqali norozilik bildirdik, chunki to`rtta orolda harbiylar (Rossiya Federasiyasining borligi) kuchayib borishi Yaponiya pozisiyasiga zid keladi. Bu muammoni bir butunlikda echish uchun avvalo bu orollarning hududiy tegishlilik masalalarini hal qilib olishimiz kerak”, degan Yosixide Suga.

Ma`lum bo`lishicha, Tinch okeani floti aviasiya va kemalarining keng ko`lamli o`quv-mashg`ulotlarida 2,5 mingdan ziyod kishi va 800 ta texnika qatnashmoqda.

Aslida ayni masala yuzasidan Yaponiyaning Rossiyaga norozilik bildirishi negizida ko`p yillardan buyon Moskva va Tokioning Kuril orollarining janubiy qismiga egalik qilish masalasida bir to`xtamga kelolmasligi sabab. Chunki Ikkinchi jahon urushidan keyin butun arxipelag sobiq Ittifoq tarkibiga o`tgan bo`lsada, Yaponiya Itirup, Kunashir, Shikotan va boshqa bir guruh orollarni o`ziga tegishli ekanligini ta`kidlab keladi.