Iyun oyida vafot etgan “Lokomotiv” klubi futbolchisi Aleksandr Shadrinning otasi Vyacheslav Shadrin o`g`linining o`limi sabablari haqida Arena.Uz saytiga bergan intervyusi davomida so`zlab o`tdi.
“Pankreatit bo`lgan ekan. Biz bunga qadar uning oshqozonida yarasi bor deb o`ylagandik. Qolaversa, gastrit deb ham taxmin qilganmiz, biroq barcha o`ylaganlarimiz noto`g`ri ekan. Faqat buni bilganimizda Sashaning hayoti deyarli tugab bo`lgandi”,-dedi Vyacheslav Shadrin.
Shuningdek, Vyacheslav Shadrin pankreatit kasalligini faqatgina harakatga kelganida bilish mumkin ekanligini va shu sababli shifokorlar aniq tashxis qo`yishga qiynalishganini aytdi. “Ular ham gastrit yoki oshqozon yarasi deb o`ylashgan”,-deb javob berdi futbolchining otasi.
Ma`lum bo`lishicha, Aleksandr Shadrin 2013 yilning iyun oyida kasallik tufayli jarrohlik stoliga yotishga majbur bo`lgan. Lekin shifokorlar kasallikka sabab topa olishmagan va o`sha operasiyadan so`ng gastrit bo`yicha davolanib yurgan.
Afsuski, Aleksandr Shadrin bu yilgi operasiyadan chiqqan va bir kun o`tgach, 22 iyun kuni 26 yoshida vafot etgan.
