Июнь ойида вафот этган “Локомотив” клуби футболчиси Александр Шадриннинг отаси Вячеслав Шадрин ўғлинининг ўлими сабаблари ҳақида Арена.Уз сайтига берган интервьюси давомида сўзлаб ўтди.
“Панкреатит бўлган экан. Биз бунга қадар унинг ошқозонида яраси бор деб ўйлагандик. Қолаверса, гастрит деб ҳам тахмин қилганмиз, бироқ барча ўйлаганларимиз нотўғри экан. Фақат буни билганимизда Сашанинг ҳаёти деярли тугаб бўлганди”,-деди Вячеслав Шадрин.
Шунингдек, Вячеслав Шадрин панкреатит касаллигини фақатгина ҳаракатга келганида билиш мумкин эканлигини ва шу сабабли шифокорлар аниқ ташхис қўйишга қийналишганини айтди. “Улар ҳам гастрит ёки ошқозон яраси деб ўйлашган”,-деб жавоб берди футболчининг отаси.
Маълум бўлишича, Александр Шадрин 2013 йилнинг июнь ойида касаллик туфайли жарроҳлик столига ётишга мажбур бўлган. Лекин шифокорлар касалликка сабаб топа олишмаган ва ўша операциядан сўнг гастрит бўйича даволаниб юрган.
Афсуски, Александр Шадрин бу йилги операциядан чиққан ва бир кун ўтгач, 22 июнь куни 26 ёшида вафот этган.
