Moskva viloyatining Istra shahrida besh yildan beri qurilishda ishlab kelayotgan tojikistonlik 41 yoshli Dilshod Tohirov kunlardan bir kuni bolakayni qutqarib qolaman, deb o`ylamagan edi.
22 avgust kuni kechqurun Istra tumanidagi kottej tipidagi posyolka hududida bolalarning yordam so`rab qichqirgani eshitildi. Ikki nafar qizaloq dugonalariga katta it hujum qilganini aytib baqirishardi.
Qo`shni uyda ishlayotgan Dilshod va uning yurtdoshlari bir soniya ham o`ylab o`tirmasdan qo`llariga tushgan narsani – belkurakni olib, qizcha tomon yugurdi. Ular dahshatli hodisani ko`rib qolishdi: bahaybat rotveyler 11 yoshli Nastyani bo`ynidan tishlab olgan va qo`yib yubormayotgan edi.
Migrant-quruvchilar qo`llaridan kelgan ishni bajarishdi: kimdir qon ketishini to`xtatmoqchi bo`ldi, boshqasi esa qizning bo`ynini bint bilan bog`ladi, uchinchisi esa qizchaning pulsini tekshirdi. Dilshod esa Nastyaning buvisini aytib kelishga chopib ketdi. Migrantlar tez yordam chaqirishdi, har bir daqiqani g`animat bilgan holda Nastyani katta yo`lgacha olib chiqishdi.
“Biz Dilshoddan minnatdormiz. Agar u bo`lmaganida… Operasiya uch soat davom etdi, so`ng anesteziolog chiqib, bugun Nastya ikkinchi bor tug`ilganini aytdi. Ko`ppakning o`tkir tishlari Nastyaning arteriyasiga etishiga bir bahya qolibdi, unda kech bo`lardi. Nabiram operasiyadan keyin o`ziga kelganidan so`ng, mendan “Buvi meni farishtalar qutqardimi?” deb so`radi. Men shuni aytamanki, Markaziy Osiyo xalqlari bolalar va ota-onalarini juda ham qadrlashadi. Dilshod bir soniya ham o`ylab o`tirmasdan qizchani qutqarishga shoshildi”, deydi Olga Aleksandrovna.
Najotkor Dilshod Tohirov – olti nafar farzandning otasi bo`lib, oilasi Tojikistonda yashaydi.
