Bugun poytaxtimizdagi Ice city sport-ko`ngilochar maskani muz maydonida qishki sport turlari qiroli deb e`tirof etilgan xokkey bo`yicha O`zbekiston birinchi chempionati boshlandi.
Chempionatning ochilish marosimida Milliy Olimpiya qo`mitasi prezidenti Umid Ahmadjonov so`zga chiqdi, deb xabar bermoqda O`zA.
- Bugun O`zbekiston uchun tarixiy kun - xokkey bo`yicha birinchi O`zbekiston chempionati boshlanmoqda. Umid qilamanki yurtimizda sportga berilayotgan ulkan e`tibor samarasi o`laroq yana qayta tiklangan xokkey sporti qisqa muddatda yoshlarimiz orasida keng ommalashadi va xalqaro arenalarda o`z so`zini aytadi, - dedi U.Ahmadjonov.
Shundan so`ng muz maydoni ustiga o`zbek xokkey maktabi faxriylari “Binokor“ jamoasi a`zolari taklif etildi va ularga esdalik sovg`alari topshirildi.
Tarixiy O`zbekiston chempionati bahslarini “Toshkent“ va o`sha birinchi xokkey jamoamiz “Binokor“ vakillari boshlab berishdi.
