Бугун пойтахтимиздаги Ice city спорт-кўнгилочар маскани муз майдонида қишки спорт турлари қироли деб эътироф этилган хоккей бўйича Ўзбекистон биринчи чемпионати бошланди.
Чемпионатнинг очилиш маросимида Миллий Олимпия қўмитаси президенти Умид Аҳмаджонов сўзга чиқди, деб хабар бермоқда ЎзА.
- Бугун Ўзбекистон учун тарихий кун - хоккей бўйича биринчи Ўзбекистон чемпионати бошланмоқда. Умид қиламанки юртимизда спортга берилаётган улкан эътибор самараси ўлароқ яна қайта тикланган хоккей спорти қисқа муддатда ёшларимиз орасида кенг оммалашади ва халқаро ареналарда ўз сўзини айтади, - деди У.Аҳмаджонов.
Шундан сўнг муз майдони устига ўзбек хоккей мактаби фахрийлари “Бинокор“ жамоаси аъзолари таклиф этилди ва уларга эсдалик совғалари топширилди.
Тарихий Ўзбекистон чемпионати баҳсларини “Тошкент“ ва ўша биринчи хоккей жамоамиз “Бинокор“ вакиллари бошлаб беришди.
