Kolumbiyalik shifokorlar qornida embrion bo`lgan chaqaloqni operasiya qilishdi, deb xabar berdi Lenta ru nashri.
Kolumbiyaning Barrankilya shahrida yashovchi 33 yoshli Monika Vega (Monica Vega) homiladorlikning to`qqizinchi oyida ko`rikdan o`tish uchun shifxonaga keldi. Tekshiruv jarayonida shifokorlar bolaning tanasida shubhali deformasiya borligini aniqlashdi. Ma`lum bo`lishicha, chaqaloqning qornida yana bir embrion bo`lgan.
22 fevral kuni ayol kesarcha kesish jarrohlik amaliyoti orqali Itzamara (Itzamara) ismli qizchani dunyoga keltirdi. Shifokorlar zudlik bilan chaqaloqni operasiya qilib, uning ichiga joylashib qolgan 45 millimetr, og`irligi 14 gramm bo`lgan egizagining embrionini olib tashlashdi. Embrionning qo`li va oyog`i rivojlanganiga qaramay, miyasi va yuragi bo`lmagan.
Shifokorlarning ta`kidlashicha, ular ilk marotaba bunday hodisaga duch kelishgan. Ilgarilari bolaning ahvoli tug`ilganidan keyin ma`lum bo`lgan bo`lsa, bu holatda shifokorlar undagi kamchilikni ona qornidayoq aniqlashgan.
Hozirda qizaloq o`zini yaxshi his qilmoqda, uning hayoti xavf ostida emas. Bunday kamyob anomaliya yarim million homilador ayoldan bittasida uchraydi. Egizaklardan birining tanasiga tasodifan joylashib qolgan embrion mustaqil ravishda rivojlana olmaydi.
