Колумбиялик шифокорлар қорнида эмбрион бўлган чақалоқни операция қилишди, деб хабар берди Лента ру нашри.
Колумбиянинг Барранкилья шаҳрида яшовчи 33 ёшли Моника Вега (Мonica Vega) ҳомиладорликнинг тўққизинчи ойида кўрикдан ўтиш учун шифхонага келди. Текширув жараёнида шифокорлар боланинг танасида шубҳали деформация борлигини аниқлашди. Маълум бўлишича, чақалоқнинг қорнида яна бир эмбрион бўлган.
22 февраль куни аёл кесарча кесиш жарроҳлик амалиёти орқали Итзамара (Itzamara) исмли қизчани дунёга келтирди. Шифокорлар зудлик билан чақалоқни операция қилиб, унинг ичига жойлашиб қолган 45 миллиметр, оғирлиги 14 грамм бўлган эгизагининг эмбрионини олиб ташлашди. Эмбрионнинг қўли ва оёғи ривожланганига қарамай, мияси ва юраги бўлмаган.
Шифокорларнинг таъкидлашича, улар илк маротаба бундай ҳодисага дуч келишган. Илгарилари боланинг аҳволи туғилганидан кейин маълум бўлган бўлса, бу ҳолатда шифокорлар ундаги камчиликни она қорнидаёқ аниқлашган.
Ҳозирда қизалоқ ўзини яхши ҳис қилмоқда, унинг ҳаёти хавф остида эмас. Бундай камёб аномалия ярим миллион ҳомиладор аёлдан биттасида учрайди. Эгизаклардан бирининг танасига тасодифан жойлашиб қолган эмбрион мустақил равишда ривожлана олмайди.
