Turk dunyosi kinoijodkorlari uyushmasi tashabbusi bilan o`tkaziladigan Turk dunyosi hujjatli filmlarining xalqaro kinofestivali bu yili to`rtinchi marta Istanbul shahrida o`tkazildi, deya xabar qilmoqda “O`zbekkino” matbuot xizmati.
Ushbu nufuzli kinofestivalda turkiy tilli davlatlardan “ 9 mamlakat 9 shahar” shiori ostida kinoijodkorlar guruhi o`zlarining hujjatli filmlari bilan qatnashishdi. Ahamiyatli jihati shundaki, mazkur nufuzli kinofestivalda taniqli o`zbek rejissyori Shuhrat Mahmudov hakamlar hay`atiga raislik qildi.
Xalqaro tanlovda dunyoning turli mamlakatlaridan hujjatli film prodyusserlari va rejissyorlari ishtirok etishdi.
Tanlovda professional kategoriyada oliy mukofotni turkiyalik rejissyor Neyla Demirchining "Yuzma-yuz" hujjatli filmi, ikkinchi mukofotni misrlik Maryam Al Marakeshiyning "Tranzit", uchinchi o`rinni turkiyalik rejissyorning "Vatanga ketarkan..." jujjatli filmlari qo`lga kiritdi.