Hukumat tomonidan “Onlayn nazorat-kassa mashinalari va virtual kassa tizimi qo`llanilishini ta`minlash chora-tadbirlari to`g`risida” qaror qabul qilindi. Bu haqda Adliya vazirligi xabar bermoqda.
Qarorga muvofiq, naqd pul tushumiga ega tadbirkorlar aholidan naqd pulni qabul qilishda Prezidentining 2019 yil 6 sentyabrdagi PF-5813-son (http://lex.uz/docs/4502381) Farmoni bilan tasdiqlangan grafikda belgilangan muddatga qadar onlayn-nazorat kassa mashinalari yoki virtual kassadan foydalanishga ixtiyoriy, ushbu muddat tugagach majburiy ravishda o`tadilar (istisno holatlar mavjud (http://lex.uz/docs/4502381)).
Qaror bilan, Aholi bilan pulli hisob-kitoblarni amalga oshirishda onlayn-nazorat kassa mashinalari yoki virtual kassa tizimini qo`llash tartibi to`g`risida nizom tasdiqlandi.
Nizomga ko`ra, O`zbekiston hududida faqat belgilangan tartibda Davlat reestriga kiritilgan onlayn-NKM va virtual kassalardan foydalanishga ruxsat etiladi.
Tadbirkorlar Davlat reestriga kiritilgan onlayn-NKM va (yoki) virtual kassalarni mustaqil sotib olishi hamda texnik xizmat ko`rsatish markazlarini ixtiyoriy tanlash huquqiga ega.
Onlayn-NKM va (yoki) virtual kassalar davlat soliq xizmatlari organlarida ro`yxatdan o`tkazilishi lozim, ro`yxatdan o`tkazganlik uchun to`lov undirilmaydi.
