Xabaringiz bor, joriy qilingan yangi tartibga ko`ra telefonlarning IMEI-kodlarini ro`yxatdan o`tkazish 1 dekabr kunidan pullik etib belgilandi. Kimdir bunga ulgurdi, kimdir esa yo`q, yana kimlardir hali xamon buning o`zi nima ekanligini tushunib ham etgani yo`q. Bu degani, endi majburiy asnoda pul to`lab ro`yxatdan o`tadi, degani. Ushbu yangilik mavjud bir qator muammolar ustiga muammo bo`lib qo`shildi desak, adashmaymiz. Xususan, huquqshunos va bloger Xushnud Xudoyberdiev mazkur joriy etilgan “innavasion” tizimga munosib baho berdi:
“Ayrim islohotlarni ko`rib, maqsad foyda keltirish emas, balki xalqni sog`in sigirdek sog`ishmikin deb o`ylanib qoladi odam.
Masalan, telefonlarning IMEI-kodlarini ro`yxatdan o`tkazish tizimidan balki ezgu maqsadlar ko`zlangandir, ammo uni amalga oshirish tartibi xalqni qiynashdan nariga o`tmadi. Jumladan:
Birinchidan, barcha mobil qurilmalarni avtomatik ro`yxatdan o`tkazish uchun juda qisqa vaqt berildi. Garchi hammayoqda 1 apreldan 1 noyabrgacha deyilgan bo`lsada, lekin aslida IMEI-kodlarni ro`yxatga olish tartibini Vazirlar Mahkamasi 17 sentyabrda tasdiqladi (http://lex.uz/docs/4517458). Ya`ni 1 noyabr degan muddat xalqqa salkam oktyabrda ma`lum bo`ldi. OAVlarda asosiy targ`ibotlar ham oktyabrdan boshlandi.
Bu degani, xalqqa ishlatilmayotgan telefoni yoki ikkinchi sim-kartasini avtomatik ro`yxatdan o`tkazish uchun taxminan 1 oy vaqt berildi. Bu noinsoflik!!!
Ikkinchidan, 1 noyabrdan ariza orqali ro`yxatdan o`tishda juda ko`plab muammolar paydo bo`lmoqda. Ayniqsa, 2 ta sim-kartali telefon ishlatadigan juda ko`pchilik yangiliklardan kech xabar topganining evaziga (tayinli targ`ibot ham qilishmadi) hozir boshi qotgan.
Sababi 1 noyabrdan keyin ikkinchi slotni ro`yxatdan o`tkazib bo`lmayapti, garchi 1ta IMEI-kod bazada bo`lsa ham, rad javobi kelmoqda.
Ro`yxatdan o`tish uchun xorijga chiqib kelish kerak emish. «Hech bo`lmasa Qozog`istonga chiqib keling, keyin ro`yxatdan o`tkazamiz» deyishmoqda.
Bu nima ahmoqgarchilik??? Nega bu haqida avval ogohlantirishmagan?
Uchinchidan, ro`yxatdan o`tkazish rad etilayotganiga sabab — bojxonani chetlab o`tib, yashirin yo`llar bilan olib kirilgani bo`lsa, unda nega buning jabrini xalq tortishi kerak? Chegarachilar, bojxonachilar yoki yashirin yo`llarga sharoit yaratib bergan korrupsionerlarga hech narsa bo`lmasdan, yana oddiy xalq sarson bo`lishi kerakmi?
Axir o`sha telefonlarni peshona teri bilan topgan pullariga rasmiy ishlab turgan do`konlardan sotib olishganku. Nega shuncha payt do`konlarda noqonuniy telefonlarni sotishga yo`l qo`yganlar jazolanmasdan, jabrdiyda xalq tovon to`lashi kerak? Nima uchun??? Nima uchun???
To`rtinchidan, xo`p, bo`lar ish bo`ldi, deylik. Endi nima qilish kerak? Muammoni echish uchun biror qonuniy echim bormi? Minglab fuqarolar ro`yxatdan o`tkazish uchun xorijga chiqib kela olmaydi baribir. Xalqqa bezbetlarcha «chetga chiqib keling, yo`qsa iloji yo`q» demasdan biror echim bermaysizlarmi?
Beshinchidan, bilamizki 1 dekabrdan ro`yxatdan o`tkazish pullik bo`ladi. Mayli, tekin bo`lsin demayman, ammo nega narx bunchalik qimmat? Biror asosi bormi? Shunchaki 1ta kodni tarmoqqa kiritib qo`yish uchun 44 ming 600 so`m olishga uyalmaysizlarmi?
Boz ustiga, agar telefon 2ta sim-kartali bo`lsa, unda har biri uchun alohida to`lov qilinadi, demak 89 ming so`m bo`lyapti. 30 kundan o`tib ro`yxatga olinsa, 110 ming so`m bo`ladi. Nega 10 ming so`m emas, nega 20 ming so`m emas? Xalqni juda boooooooy deb o`ylaysizlar shekilli? Pullari oshib-toshib ketyapti, qaerga qo`yishni bilmayapti, deya tasavvur qilasizlarmi?
Xalq to`layotgan soliqlar qayoqqa ketyapti unda? Bu tizimdan maqsad xalqqa foyda bo`lish deyishmoqda, axir foydali tizimlar ishlab chiqish davlatning majburiyati emasmi? Bizning soliqlarni shuning uchun olyapsizlarku. Xalqqa ikki marta soliq solish (va qimmat soliq) insofsizlik axir!
Xalq sog`in sigir emas, shuni unutib qo`ymaylik, iltimooooos...
Noyabr oyi tugadi. Ammo soha mutasaddilari yuzaga kelgan muammolarni echish uchun zig`ircha harakat qilmadi, xalqqa tushuntirish bermadi, targ`ibot olib bormadi. «Nega rad qilinganini bilmadim, bu muammo seniki, menga nima» degan prinsipda ish olib borildi. 1 kun o`tib esa, ro`yxatga olish pullik bo`ldi. Xalq yana pul to`lashni boshlaydi...
To`layveradi, to`layveradi, to`layveradi...”
