Kinorejissyor Nozim To`laxo`jaev “O`zbekkino” Milliy agentligi buyurtmasiga “Tanho qayiq” badiiy filmini suratga oldi.
Kinoasar syujetiga ko`ra, Orol bo`yidagi kimsasiz ovulda keksa bir qayiqsoz yolg`iz yashaydi. U tevarak-atrofdagi ovullardan bekorchi yosh-yalangni yoniga olib, ularga ota-bobolardan qolgan bu qadimiy kasbni o`rgatadi va shu barobari chin insoniylikdan saboq beradi. Dengiz esa yuzlab chaqirim nariga ketib qolgan.
Lekin qariya bir kunmas-bir kun uning suvga to`lishiga ishonadi. Bu shunchaki orzu yoxud havoyi ishonch emas. Cholning qat`iy fikricha, “buning uchun biz - odamlar halol, insofli va olijanob yashamoqqa ahd qilsak, kifoya”.
Film ijodkorlarining ta`kidlashicha, Orol fojiasi bir bahona, asar aslida inson qalbining dag`allashib, qurib-sayozlashib boruvidan paydo bo`ladigan falokatlar haqida.
Kartinada Rajab Adashev, Gulsanem Abatbaeva, Bunyod Rahmatullaev, Murod Nasimov, Ozodbek Xurramov, Sarvar Ilhomov, Bobur Yo`ldoshev, Shodiya Abduqodirova, Dilorom Karimova kabi aktyorlar rol ijro etgan.
“Tanho qayiq” badiiy filmining postanovkachi operatori – Oskar Baxteev, postanovkachi rassomi – Shuhrat Abdumalikov, bastakori – Dmitriy Yanov-Yanovskiy.