Bosh prokuror Surxondaryo viloyati xalq deputatlari viloyat Kengashining sessiyasida O`zbekiston Respublikasi Prezidentining Murojaatnomasida belgilangan ustuvor vazifalar hamda ularning ijrosini ta`minlash yuzasidan ma`ruza qildi.
Ma`ruzada asosiy e`tibor hududlarda umumiy jinoyatchilik ahvoli, sog`liqni saqlash, ta`lim, qurilish, er ajratish sohalarida korrupsiyaning oldini olish va boshqa dolzarb masalalarga qaratilib, qayd etilgan sohalar tanqid ostiga olindi.
Noqonuniy qurilmalar bo`yicha keng jamoatchilikni xabardor qilish hamda bunday noqonuniy harakatlarning oldini olish maqsadida bu kabi qonunbuzilishlarni ommaviy axborot vositalarida keng yoritib borish yuzasidan ko`rsatmalar berildi, tegishli mansabdor shaxslar qat`iy ogohlantirildi.
Shuningdek, sessiyada sektorlar rahbarlariga mas`uliyatlarini yanada oshirish va xalq deputatlari mahalliy Kengashlariga o`z faoliyati to`g`risida doimiy ravishda hisobot taqdim etib borishlari bo`yicha ko`rsatma berildi. Mahalliy Kengashlarga esa, sektorlar faoliyati ustidan ta`sirchan deputatlik nazoratini o`rnatishlari tavsiya etildi.
