Qozog`istonda mart oyida lotin alifbosining so`nggi versiyasi tasdiqlanadi. Bu haqda bugun Qozog`iston Respublikasi Madaniyat va sport ishlari vazirligi Til siyosati qo`mitasi raisining o`rinbosari Adilbek Qaba ma`lum qildi, deb xabar berdi Kazinform xabariga tayanib Sof.uz.
«Ma`lumki, Qozog`iston Prezidenti Qasim-Jomart Toqaev lotin alifbosiga asoslangan qozoq alifbosini takomillashtirish vazifasini qo`ydi. Ushbu topshiriqdan so`ng uch-to`rt oy ichida olimlar to`rtta sessiya o`tkazdilar. O`sha yig`ilishlarda alifboning bir nechta variantlari ko`rib chiqildi. Hammasi bo`lib, bugungi kungacha 40dan ortiq alifbo loyihalari qabul qilindi. Shulardan 30 tasi olimlar tomonidan rasman ko`rib chiqilgan. Hech bir loyiha e`tibordan chetda qolmadi. Biz hammasini tahlil qildik va muhokama qildik va barcha kerakli ma`lumotlarni hisobga oldik. Biz ularning mualliflariga javob berdik», - dedi.
Qo`mita raisi o`rinbosarining so`zlariga ko`ra, ushbu loyihalardan to`rttasi tanlab olingan va qayta muhokama qilingan. 4 fevral kuni ushbu loyihalar respublika miqyosida muhokamaga qo`yildi.
«Olimlar duch kelgan muammolardan biri shundaki, oldingi kirill alifbosidagi nechta harf bo`lsa, bu erda ham shuncha bo`lishi kerak degan tamoyil bor, ammo bunday yondashuv yaramaydi. Ma`lumki, qozoq tilida boshqa tillardan o`zlashtirilgan keraksiz tovushlar mavjud. Lotin yozuviga o`tish, shuningdek, mamlakatimizning notinch davrlarida majburan kiritilgan tovushlardan xalos bo`lishning asosiy omillaridan biridir. Agar ilgari 42 ta harf bo`lsa, endi 31 yoki 32 ta bo`lishi mumkin. Biroq, shuning o`zi qozoq tilidagi tovushlarning o`ziga xos xususiyatlarini to`liq ifodalashi mumkin», - dedi Adilbek Qaba.
Uning so`zlariga ko`ra, Til siyosati qo`mitasi 14 fevral kuni mintaqalardagi til bo`limlari ishtirokida milliy ochiq muhokamalar o`tkazdi. Taklif etilgan loyihalar bo`yicha hududdagi filologlar va tilshunoslar o`z mulohazalarini bildirdilar. Ushbu va boshqa bahs-munozaralar asosida 20 fevral kuni Almatidagi olimlardan iborat ishchi guruh taklif qilinib, har bir loyihadan foydalangan holda bitta loyihani ishlab chiqildi va tasdiqlandi.
«Prezident ma`muriyati rahbarining birinchi o`rinbosari Maulen Ashimbaev olimlar bilan uchrashuv o`tkazdi va ushbu masalani muhokama qildi. U erda ba`zi harflarni qayta ko`rib chiqish topshirildi. Ushbu loyiha deyarli Prezident devoni tomonidan ma`qullangan. Bitta-ikkita o`zlashtirilgan tovushlar to`g`risida umumiy fikrga kelishgina qolmoqda. 13 mart kuni barcha olimlar uchun katta yig`ilish bo`lib o`tadi. Shu yig`ilishda ma`qul ko`rilgan alifbo tasdiqlanib, Hukumat komissiyasiga taqdim etilishi kerak», - dedi u.
