Aziza Shonazarova poytaxtimizning Qoraqamish dahasida voyaga etib, Toshkent sharqshunoslik institutida, keyinchalik Polsha va AQShdagi mashhur universitetlarda ta`lim olgan. 32 yoshida tarix va dinshunoslik yo`nalishida fan doktori bo`lgan. Kuni kecha Prezidentimiz tomonidan “Do`stlik” ordeni bilan mukofotlandi.
Toshkent davlat sharqshunoslik institutida Innovasion rivojlanish vazirligi tashabbusi bilan O`zbekiston Respublikasi Prezidenti Administrasiyasi, mamlakatimizning AQShdagi elchixonasi hamkorligida o`zbeklar orasida birinchi bor AQShdagi Kolumbiya universiteti professori bo`lgan yosh olima bilan uchrashuv tashkil etildi.
Aziza ilmiy ish bilan birga chet ellik talabalarga dars beradi. Dastlab Indiana universitetida dars berish faoliyatini boshlagan, keyin Stanford universitetida lektor darajasida o`z faoliyatini davom ettirdi. Oksford universiteti Islomshunoslik markazining ilmiy tadqiqotchisi hisoblanib, u erda ham ma`ruzalar o`qiydi. AQSh, Evropa va Osiyo mamlakatlaridagi bir qancha etakchi universitetlar va ilmiy markazlar bilan hamkorlik qiladi.
Uchrashuvda Aziza Shonazarovaga Sharqshunoslik institutining tarix fanlari bo`yicha falsafa doktori (PhD) unvoni topshirildi. Rus, ingliz, turk, arab, fors, nemis, fransuz, polyak tillarini puxta egallagan yosh olima O`zbekistonda keng jamoatchilik vakillari, olimlar, yoshlar bilan uchrashishni rejalashtirgan. Yoshlarning ilm-fanga mehrini oshirish maqsadida Abu Ali ibn Sino nomidagi yosh biologlar va kimyogarlar ixtisoslashtirilgan maktab-internati va Mirzo Ulug`bek nomidagi ixtisoslashtirilgan davlat umumta`lim maktab-internati o`quvchilari bilan ham suhbat o`tkazishi kutilmoqda.
