12 mart kuni Toshkent shahrining Uchtepa tumanida «Sogdiana» art-markazining turistik mavsumi ochilishi bo`lib o`tdi. Tadbirda «Art-centre Sogdiana» ta`sischilari bilan bir qatorda O`zbekiston davlat san`at va madaniyat instituti, O`zbekiston davlat xoreografiya akademiyasi talabalari, san`atshunoslar Gulnora Musaeva, Elena Kari-Yakubova va Sherzod Kenjaevlar rahbarligi ostidagi Uspenskiy nomli musiqa liseyi o`quvchilari tomonidan ajoyib sahnalashtirilgan dastur namoyish etildi.
Ochilish marosimida mehmonlarga milliy urf-odatlarimiz ham ko`rsatilib, ular orqali laparlarimiz ham targ`ib qilindi. Shu bilan birga, milliy hunarmandchilik mahsulotlarini tayyorlash bo`yicha mahorat darslari o`tkazildi. Mahorat darslari markazga tashrif buyurgan mehmonlarda katta taassurot qoldirdi. Ta`kidlash joizki, «Sogdiana» markazi faoliyati yurtimizga kelayotgan sayyohlik oqimiga ijobiy ta`sir ko`rsatib, turizm sohasini rivojlantirish, jumladan Toshkent shahri sayyohlik salohiyatini namoyish qilishga katta hissa qo`shmoqda. «Sogdiana» zamonaviy tasviriy va amaliy san`at markazi mahalliy va xorijiy sayyohlar uchun ayni muddaodir.
Bu erdagi milliy hunarmandchilik mahsulotlari va tasviriy san`at namunalari har qanday nozik didli mehmonga ma`qul bo`lishi shubhasiz, zero markaz noyob va original milliy mahsulotlari bilan tanilib ulgurgan. Markaz sayyohlik mavsumi davomida mehmonlarni an`anaviy o`zbek musiqasi, milliy an`analari, rassomlar ko`rgazmalari hamda mahorat darslari bilan hayratga soladi va quvontiradi. O`zbekiston san`atiga oid ma`ruzalar, shuningdek, kulolchilik, rassomlik, o`zbek raqsi va boshqa ko`plab ijodiy mahorat darslari bo`lib o`tadi.
Shunday ekan, bunday kreativ va noyob, zamonaviylik va qadimiylik uyg`unlashgan maskanga tashrif buyuring va bularning bariga o`zingiz ishonch hosil qiling! Ma`lumot uchun: «Art-centre Sogdiana» 2019 yil 30 avgustda, Mustaqilligimizning 28 yilligi oldidan Turizmni rivojlantirish davlat qo`mitasi qo`llab-quvvatlashi ostida ochilgan. «Sogdiana» art-markazi manzili: Farhod ko`chasi, 31-A uy. Mo`ljal: Uchtepa Outlet Telefon: +998 93 376 03 40.
