Ijtimoiy tarmoqlarda keng muxokamaga sabab bo`lgan “Marhamat tumani hokimi o`rinbosari madaniyat bo`limi boshlig`ini, haqorat qildi” sarlavha ostidagi murojaat yuzasidan Andijon viloyat hokimligi Matbuot xizmati xabar qildi.
Ushbu murojaat Andijon viloyat hokimligi tomonidan o`rganib chiqildi. O`rganish davomida joriy yilning 11 mart kuni tumandagi “Marhamat baraka chevarlari” tikuvchilik sexining ochilish marosimiga tuman madaniyat bo`limi xodimlari soat 8:00 ga kelib tadbirda ovoz kuchaytirgich, mikrofon va qolgan moslamalari bilan tadbirda qatnashishi kerak bo`lgan. Biroq madaniyat xodimlari tadbirga aytilgan vaqtda etib kelmagan. Tadbirga mas`ul etib tayinlangan M.Sotvoldieva tadbir ko`ngildagidek o`tmaganligi hamda tadbirga yig`ilganlar oldida mikrofon va ovoz kuchaytirgichni vaqtida tayyor bo`lmaganligidan sababli jahl ustida tuman madaniyat bo`limi boshlig`iga telefonda “Seni ishdan haydataman, mas`uliyatli bo`lganingda tumandagilarni oldida sharmanda bo`lmasdim” -deb so`kkanligi, shundan so`ng tuman madaniyat bo`limi boshlig`i A.Yuldashevga bu gaplar og`ir botib, jahl ustida internet tarmog`iga chiqarib yuborganligi aniqlandi.
Andijon viloyati hokimi o`rinbosari, Mahalla va oilani qo`llab-quvvatlash boshqarmasi boshlig`i Manzura Yunusova tomonidan Viloyat Madaniyat boshqarmasi boshlig`i Marxabo Sattorova ishtirokida Marhamat tumani hokimi o`rinbosari, Mahalla va oilani qo`llab-quvvatlash bo`limi rahbari Ma`muraxon Sotvoldieva hamda tuman madaniyat bo`limi boshlig`i Akmal Yuldashev bilan suhbat olib borildi.
O`tkazilgan suhbat davomida ikkala tomon ham qilgan ishlaridan afsuslanib, afsusda ekanligini bildirib bir birlaridan uzr so`radilar. Bir birlariga nisbatan gina-qudrati yo`qligini aytib, kelishib olishdilar.
Ushbu bo`lib o`tgan nohush voqea yuzasidan Marhamat tuman hokimining farmoyishiga asosan O`zbekiston Respublikasi Mehnat kodeksining 181-moddasi 1-bandi bilan Marhamat tumani hokimi o`rinbosari, Mahalla va oilani qo`llab-quvvatlash bo`limi rahbari Ma`muraxon Sotvoldieva tuman tashkiloti rahbariga nisbatan muomila madaniyatiga rioya etmaganligi uchun “Hayfsan” intizomiy jazosi berildi.
