Loyihaning galdagi qahramoni doim gap-so`zlar qurshovidagi aktrisa va keyingi vaqtlarda xonandalik, “biznes-women”lik faoliyatiga qo`l urgan Zarina NIZOMIDDINOVA. Ko`ramiz, dangal so`zlovchi bu aktrisa savollarimizga ham shunday javob berarmikin?
1. Zarina, “Ikkita qayiqni boshini tutgan, suvga g`arq bo`ladi”, deyishadi. Sizning “qayiq”laringiz bir nechta ekani bois bugun san`at “ummon”iga g`arq bo`ldingizmi?
— Raqqosalik, aktrisalik, xonandalik san`atning turlari bo`lgani uchun ularni bitta “qayiq” deb hisoblayman. Kamnamoligimga shaxsiy hayotimdagi muammolar va rejissyorlardan ko`nglimdagidek takliflar yo`qligi sabab.
2. Liboslar do`koni ochgandingiz, uning taqdiri ijodingizdagi inqirozni takrorladimi?
— To`g`ri, “biznes-women” bo`lish qo`limdan kelmadi. Shu sabab bu faoliyatimga chek qo`ydim. Aslida go`zallik saloni ochmoqchi edim. Fikrimdan qaytrishgani uchun liboslar do`koni ochgandim. To so`nggi nuqtagacha xohishimga qarshi ish bo`lgani bois bu faoliyat yarim yo`lda to`xtadi.
3. Undan ko`ra raqs bilan bugunga qadar professional darajada shug`ullanganingizda aktrisalikdan ko`ra ko`proq muvaffaqiyatlarga erisharmidingiz...
— Ustozim Karima Uzoqova ham sizning fikrlaringizni ko`p takrorlagan. Hatto “Toshkent zebolari” raqs ansambliga qaytishim kerakligini ham ta`kidlagandi. Raqsda o`zimni ko`rolmaganim bois kinoni tanlaganman. Kinoda ishlash oson deyish fikridan yiroqman. Shuni bilamanki, suratga olish maydonchasida o`zimni suvdagi baliqdek his etaman.
4. 16 yoshingizda kinodagi faoliyatingizni professional rejissyor Tamara Kamalovaning filmidan boshlagansiz. Shundan kelib chiqsak, sayoz “film”larda suratga tushishingiz ijodda yuqorilash emas, iste`dodingizni pulga chaqish-ku!
— Sayoz “film”larda suratga tushganimdan judayam afsuslanaman. Jahongir Poziljonov bilan birgalikda suratga tushgan “Iltimos, menga qarang” filmi ham shular jumlasidan. Avvallari mahoratli rejissyorlar filmiga taklif etsa hursand bo`lardim. Hozir o`sha rejissyorlarning kinokartinalari ham haminqadar bo`lib qolgan. Lekin iste`dodni charxlab turish uchun sayoz filmlar orasidan yaxshiroq taklifga ko`nishga majbur bo`lyapman-da.
5. Jiddiy janrlardagi filmlarda nega rejissyorlar sizga jabrdiyda ayol rolini munosib ko`rarkin?
— Rejissyorlar ta`biri bilan aytsam, ko`zim “gapiradi”. Tan olaman, jabrdiyda, og`ir-bosiq qiyofalar “qolip”iga tushib qolgan aktrisaman. “Romeo va Juletta” filmidan so`ng rejissyorlardan shu “qolip”dagi rollar yog`ila boshlagan va bu holat davom etmoqda.
6. Filmda sizga munosib “turmush o`rtoq” — Ulug`bek Qodirov, Adiz Rajabov, Alisher Uzoqov, Umid Iskandarov?
— Umid Iskandarov. “Oqibat” filmidagi Umid bilan juftligimga ishonaman, go`yo o`sha oila hayotda bordek. Qolgan partnyorlarim bilan ishtirokimdagi kinokartinalarni ko`rganimda ekrandagi Zarina Nizomiddinova ko`raman, xolos.
7. Omma oldida juda kalta yo ochiq liboslarda ko`rinish o`zingizga erish tuyulmaydimi?
— Yo`q, doim o`zimga yarashadigan va qulay liboslarni kiyishga odatlanganman.
8. “Nega doim gap-so`zlar mening atrofimda aylanaveradi?” degan savolga hech javob topib ko`rishga uringanmisiz?
— Yo`q! San`atkor ishining ijobiy tomonlari bilan birga shunday qiyin taraflariga ham chidashni bo`yniga olib, shu sohaga qadam qo`yadi. Umuman olganda, gap-so`zlarga bee`tiborman. Chunki inson borki, xato qiladi. Beayb -parvardigor.
9. Zarina Nizomiddinovaning fojiasi...
— ...to`laqonli oilam yo`qligi. Nasib etsa, sevib oila qurish va yana bitta o`g`il farzandli bo`lishni niyat qilganman.
Maxsus savol!
10. Otabek Mahkamov, huquqshunos: — Ishtirokimizdagi “Men yulduzman” filmida qahramoningiz Lolaning qaysi jihatlari sizniki bilan bir xil. Va uning fe`lidagi qaysi qusurlar sizda bo`lmasligini istardingiz?
— O`jarligi, shoshqaloqlik bilan qaror qabul qilishi va itdan qo`rqishi o`zimga o`xshaydi. Qahramonim fe`lidagi kuchli nafrat shukrki, mening tabiatimga xos emas. Har doim odamlarning ko`ngliga qarab muomala qilaman, nimadir yoqmasa ham bilintirmayman.
Sadoqat ALLABERGANOVA suhbatlashdi.
