1-2 may kunlari O`zbekiston hududiga Turkmaniston orqali Kaspiy dengizining janubiy rayonlari ustida shakllangan nam havo oqimi kiradi, deya xabar bermoqda O`zbekiston Gidrometeorologiya xizmati.
1 mayda Buxoro, Navoiy, Qashqadaryo, Surxondaryo, Samarqand viloyatlarida kunning ikkinchi yarmida yomg`ir, ayrim joylarga kuchli yomg`ir yog`ishi kutilmoqda, momaqaldiroq bo`lishi mumkin. Respublikaning qolgan hududlarida kechga borib yomg`ir, ayrim joylarga kuchli yomg`ir yog`ishi, momaqaldiroq bo`lishi mumkin. Qoraqalpog`istonda, Andijon, Namangan, Farg`ona viloyatlarida yog`ingarchilik bo`lmaydi.
2 mayda respublikada yomg`ir, ayrim joylarga kuchli yomg`ir yog`adi, momaqaldiroq bo`lishi mumkin. Buxoro va Navoiy viloyatlarida kechasi va ertalab yomg`ir, ayrim joylarga kuchli yomg`ir yog`adi, momaqaldiroq bo`lishi mumkin. Qoraqalpog`istonda, Xorazm viloyatida yog`ingarchilik bo`lmaydi.
Shamolning tezligi 15-29 m/s gacha kuchayishi, ayrim joylarda shamol shiddati 23-28 m/s gacha etishi mumkin.
30 aprel-3 may kunlari respublikaning tog`oldi va tog`li hududlarida sel kelishi xavfi bor.
27 aprel kuni respublikamiz hududiga kirib kelgan kuchli shamol Buxoro, Navoiy, Samarqand va Qashqadaryo viloyatlarida aholi hayoti, infratuzilma tarmoqlari va qishloq xo`jaligi ekinlariga katta zarar etkazgan.
Yuzaga kelgan shamol oqibatlarining asosiy qismi Buxoro viloyatiga to`g`ri keladi. Viloyat sog`liqni saqlash boshqarmasining bergan ma`lumotiga ko`ra, taxminan 29 nafar fuqaro engil va 1 nafar fuqaro og`ir tan jarohati olgan bo`lib, 1 ta holatda o`lim qayd etilgan.
Shuningdek, Buxoroda Amudaryo tomondan suv toshqini bo`lishi haqidagi xabarlar paydo bo`lgandi va ushbu xabar viloyat hokimligi, shuningdek, Suv xao`jaligi vazirligi tomonidan inkor etildi. Shundan so`ng, Olot va Qorako`l aholisini suv bosishi haqidagi xabarlar bilan vahimaga solganlar ushlandi.
