25

25 yildan so`ng Mohira Asadova yana sahnaga qaytmoqda... Xonanda madaniyat vaziri bilan uchrashdi

Madaniyat 05.07.2020, 12:46
2575
25 yildan so`ng Mohira Asadova yana sahnaga qaytmoqda... Xonanda madaniyat vaziri bilan uchrashdi

90-yillar o`zbek san`atining yorqin namoyondasi, o`z davrining mashhur taronalari ijrochisi Mohira Asadova 25 yillik tanaffusdan keyin yana katta sahnalarga qaytishi kutilmoqda. 

Mohira Asadova lisenziyasi bo`lishiga qaramasdan turli tushunarsiz “qarshiliklar”ga uchrab kelayotgandi. Uzoq yillardan buyon javobsiz savollar ham to`planib qolgandi. Mana shu masalalarga oydinlik kiritish hamda ijobiy echim topish maqsadida madaniyat vaziri Ozodbek Nazarbekov xonanda bilan uchrashdi. Bu haqda vazirlik axborot xizmati ma`lum qildi.

Uchrashuvda ko`plab respublika va xalqaro ko`rik-tanlovlar g`olibi bo`lgan Mohira Asadova hozirgi kunda davom etayotgan pandemiya davridan keyin san`at saroylarida jonli konsert berishi hamda ijod faoliyatini davom ettirishi va uni xalqqa namoyish etishida hech qanday to`sqinliklar bo`lmasligi aytib o`tildi.

Xonanda "Darakchi" gazetasiga bergan intervyusi (38-son, 19 sentyabr, 2019 yil)da katta tanaffus va "to`sqinliklar" uni ijoddan to`xtatolmaganini aytgandi:

— Bir necha yil mobaynida ekranlarda ko`rinmadim, buni ijodiy faoliyatimdagi bir tanaffus, desak to`g`ri bo`lar. Bu vaqtda muxlislardan “ijodni tark etdingizmi?”, “san`atdan ketdingizmi?” kabi so`roq-savollar ko`p bo`ldi. Bu borada men har doim shuni ta`kidlab kelaman-ki, yuragida haqiqiy san`ati, ishtiyoqi, dardi, nolasi bor inson hech qachon ijoddan to`xtolmaydi, xalqdan yiroq bo`lolmaydi. Men ham bir zum izlanishdan, yangi qo`shiqlar ustida ishlashdan to`xtaganim yo`q. Shoir aytganidek, “baxt kelganda shukr qildim, dard kelganda sabr”.

Mohira Asadova maqom va estrada yo`nalishida ijod qilib keladi. U 14-15 yoshida katta san`atga qadam qo`ygan. 20 yoshida, talabalik vaqtida Yunus Rajabiy nomidagi Respublika maqom ijrochilari ko`rik-tanlovining g`olibasi bo`lgan. "Dutorchilar", "Maqomchilar" ansambllarida faoliyat yuritgan. 

Uning estrada janridagi “Shohsanam” (1994 yil), “Muhabbatni chiqargandir chidaganga...” (1999 yil) kabi  qo`shiqlari o`z vaqtida ommalashgan.

Шарҳлар