May oyi so`nggida Jahon banki Yaqin Sharq va Afrikada chigirtkalar bilan kurashish bo`yicha favqulodda vaziyatlar dasturini amalga oshirish uchun 500 million dollar ajratganini ma`lum qilgan edi. Oradan 10 kun o`tib, O`zbekiston Favqulodda vaziyatlar vazirligi respublika bo`ylab zararli chigirtkalarning 327,4 ming gektar maydonda tarqalganligini aytib, bunga qarshi faol va tezkor choralar ko`rilayotganligini ta`kidladi. Bu ishlar qo`shni davlatlar – Qozog`iston, Qirg`iziston va Turkmaniston bilan hamkorlikda olib borilayotganligi haqida xabar qilindi.
“Iqlimning global miqyosda isib borishi oqibatida Markaziy Osiyo davlatlarida chigirtkalarni qisqa vaqt oralig`ida ko`payishi, ya`ni, 20-30 kunda tuxumni ochib chiqayotgani oxirgi yillarda jiddiy muammoga aylanmoqda. Chunki 30 yil avval ular bunday tezlikda ko`paymagan. Markaziy Osiyo hududida marokash chigirtkalari avval dengiz sathidan 1200 metr balandlikda uchragan bo`lsa, iqlimning isib borishi oqibatida bu zararkunanda hashoratlar dengiz sathidan 2200 metr balandlikda ham joylashmoqda”, – deydi chigirtkalarga qarshi kurash bo`yicha ekspert Furqat Gapparov.
Chigirtkalar barcha qishloq xo`jalik o`simliklarini zararlaydi: arpa, bug`doy, oq jo`xori, tariq, makkajo`xori, tamaki, beda, g`o`za va poliz ekinlariga, ayniqsa katta zarar etkazadi. Yoppasiga ko`paygan yillarda tok va mevali daraxtlarning barglari bilan ham oziqlanadi. Ushbu zararli hasharotlar O`zbekiston hududida qadim zamonlardan buyon mavjud. Tarixiy ma`lumotlarga ko`ra, ular o`tgan asrning birinchi yarmida ko`plab ocharchiliklarga sabab bo`lgan.
