Американинг Apple корпорацияси АҚШнинг Федерал қидирув бюросига Сан-Бернардинода хунрезликни амалга оширган террорчининг iPhone смартфонини очиб ўқиш учун сўраган ёрдамини рад этди, аммо унинг бу ҳаракатини Facebook ва Twitter компаниялари қўллаб-қувватлади, дея хабар берди “Vesti.ru” нашри.
Америка суди Apple компаниясидан терговчиларга террорчи Саид Фарукнинг смартфонидаги маълумотларни олиб беришни талаб қилди. Бунга жавобан компания раҳбари Тим Кук бундай талаб Apple мижозлари хавфсизлигига хавф туғдиради, деди. Шунга қарамай, компания муҳандислари Федерал қидирув бюросига тергов учун зарур бўлган маълумотни олиб берди, бироқ iPhone’нинг дастурли таъминотини бузишни рад этишди.
2015 йилнинг декабрь ойида Саид Фарук ва унинг рафиқаси Тэшфин Малик Американинг Сан-Бернардино шаҳридаги ногиронларга ёрдам кўрсатиш марказига бостириб кириб, бегуноҳ инсонларга қарата ўқ очган. Оқибатда 14 киши ҳалок бўлган, 21 киши тан жароҳати олиб, яраланган. Жиноятчилар қўлга олиш жараёнида йўқ қилинган. Кейинчалик бу тажовуз теракт деб қабул қилиниб, ,бунинг жавобгарлигини “Ислом давлати” гуруҳи террорчилари бўйнига олган.
