Ўзбекистон Президенти Администрацияси раҳбари Саида Мирзиёева мамлакатда қонунсизлик ва коррупцияга асло ўрин қолмаслиги лозимлигини таъкидлади. Бу ҳақда у бугун, 22 июнь куни ўзининг Telegram-каналида ёзди.
Маълум қилинишича, шу куни Ўзбекистон Республикаси Олий судининг янги раиси Робахон Маҳмудова судьялар ҳамжамияти ҳамда ҳуқуқни муҳофаза қилувчи органлар раҳбарларига таништирилган.
Саида Мирзиёева Президент Шавкат Мирзиёев адолатни инсонлар учун энг муҳим қадриятлардан бири сифатида кўп бор таъкидлаб келаётганини қайд этди.
"Жамиятимизда қонунсизлик ва коррупцияга асло ўрин қолмаслиги шарт. Зеро, ривожланиш ва фаровонликка қаратилган ҳар қандай ислоҳот фақат мустақил суднинг ишончли ҳимоясидагина ҳақиқий кучга эга бўлади", деб ёзди у.
Унинг таъкидлашича, айни пайтда Тошкент халқаро молия марказида Англия ҳуқуқи тамойилларига асосланган суд тизими шакллантирилмоқда. Шу муносабат билан амалдаги судлар ҳам халқаро илғор тажрибаларни ўрганиб, уларни ўз фаолиятига татбиқ этиши муҳим экани қайд этилди.
Мирзиёева суд тизими муайян шахсларга боғланиб қолмаслиги, кадрлар алмашинувидан қатъи назар, аниқ ва узлуксиз ишлайдиган механизмга айланиши кераклигини билдирди. Шунингдек, ҳар бир судья ўз шарафи ва обрўсини юксак сақлаган ҳолда судьялик мантиясига муносиб бўлиши лозимлигини таъкидлади.
"Робахон Анваровнага мустаҳкам ирода ҳамда доимо оқилона, ҳалол ва адолатли қарорлар қабул қилишида улкан муваффақиятлар тилайман", деди Президент Администрацияси раҳбари.
Эслатиб ўтамиз, Робахон Маҳмудова 18 июнь куни беш йил муддатга Ўзбекистон Республикаси Олий суди раиси этиб сайланган эди.
