Эркаклар учун маълум бир кун байрам сифатида нишонланмагани учун ҳам бу кунни эркаклар байрами руҳида нишонлашга ҳам одатланиб қолганмиз. Аслида эса ватан ҳимоясида хизматда бўлган ва бўлаётган барча эркак-у аёл юртдошларимизнинг байрами кенг нишонланадиган бу кун нега айнан 14 январь санасига белгиланган?
САНА ТАРИХИ
1993 йил 29 декабрь. Ўзбекистон Республикасининг 1-Президенти Ислом Каримов имзоси билан “Ватан ҳимоячилари кунини белгилаш тўғрисида” Ўзбекистон Республикасининг Қонуни қабул қилинди. Нега айнан 14 январь куни этиб белгилангани сабаби эса Қонунда қуйидагича ифодаланган:
"Ўзбекистон Республикаси Қуролли Кучларининг мамлакат мустақиллигини ҳамда ҳудудий яхлитлигини, халқимизнинг тинч ҳаётини ва мустақилликни мустаҳкамлаш йўлидаги бунёдкорлик меҳнатини ҳимоя қилишдаги, ёш авлодни ватанпарварлик руҳида тарбиялашдаги аҳамиятини, шунингдек Ўзбекистон ҳудудида жойлашган ҳарбий тузилмаларнинг 1992 йил 14 январдан республика юрисдикциясига ўтказилганлигини инобатга олиб, Ўзбекистон Республикаси Олий Кенгаши қарор қилади. 14 анварь – Ватан ҳимоячилари куни этиб белгилансин”. Мазкур қонун 1994 йилнинг 22 январидан кучга кирган.
ЎЗБЕКИСТОН АРМИЯСИНИНГ ХАЛҚАРО РЕЙТИНГДАГИ ЎРНИ, ХАРБИЙ ХИЗМАТЧИЛАРИ ВА ТЕХНИКАЛАРИ СОНИ
Global Firepower Index халқаро рейтингига кўра, Ўзбекистон армияси 2021 йилда 51-ўриннинг эгаллади. Рейтинг маълумотларига кўра, Ўзбекистон армияси 70 минг ҳарбий хизматчидан иборат бўлиб, унинг таркибида 194 та ҳаво техникаси, 420 та танк, 98 та ёппасига ўқ узиш тизимлари, 1,2 минг зирҳли техника, 60 та артиллерия қуроли мавжуд.
МАРКАЗИЙ ОСИЁДА БИРИНЧИ
Шу билан бирга, мамлакатимиз Марказий Осиёда биринчи ўринни эгаллади (Қозоғистон – 61, Туркманистон – 86, Қирғизистон – 93, Тожикистон – 99). Собиқ СССР давлатлари орасида эса Ўзбекистон тўртинчи ўринни эгаллаб, фақат Россия (2-ўрин), Украина (25-ўрин) ва Беларус (50-ўрин) армияларидан ортда қолмоқда.
ДАРВОҚЕ!
Ўзбекистон Қуролли Кучлари тарихи бўйича кўпроқ маълумотларга эга бўлишни хоҳласангиз, Ўзбекистон Қуролли Кучлари давлат музейига ташриф буюринг. 1965 йилда Марказий офицерлар уйи қошида Туркистон ҳарбий округи жанговарлик шуҳрати музейи сифатида ташкил этилган ушбу манзилда турли даврларга оид 10 мингдан зиёд экспонатлар ўрин олган. Музей биноси Тошкент шаҳри Мирзо Улуғбек туманида – Мудофаа вазирлиги биноси ёнида жойлашган. Бино олдида “Ватанга қасамёд” ҳайкали ҳам мавжуд.
Сардорбек Раҳмонқулов
