Тошкент вилоятида ўз қизининг номусига теккан эркак 12 йилга озодликдан маҳрум этилди. Бу ҳақда Ижтимоий ҳимоя миллий агентлиги матбуот хизмати маълум қилди.
Қайд этилишича, агентликнинг Тошкент вилояти туманларидан бирида оиланинг ҳолатини ўрганиш жараёнида вояга етмаган қизга нисбатан зўравонлик содир этилгани аниқланган. Оиланинг ижтимоий мақомини белгилаш ва эҳтиёжмандлар рўйхатига киритиш мақсадида агентликнинг ижтимоий ходими хизмат кўрсатиш доирасида оила аъзоларини тиббий кўрикдан ўтказишга юборган. Айнан шу кўрик қизалоқ аввал гапира олмаган воқеаларни очиқлашга туртки бўлган. Бу расмий тергов жараёнини бошлашга асос бўлди.
24 июль куни суд қарорига кўра, эркак ўз фарзандига нисбатан оғир жиноят содир этганликда айбдор деб топилди. Суд томонидан унга Жиноят кодексининг 118-моддаси 3-қисми, “а”, “б”, “э” бандлари (18 ёшга тўлмаган яқин қариндошга нисбатан номусга тегиш оғир оқибатларга олиб келиши) асосида 12 йил озодликдан маҳрум этиш жазоси тайинланди.
“Бу суд ҳукми қизалоқнинг манфаатларини таъминлаш ва унинг ҳуқуқларини ҳимоя қилишга қаратилган эътибор, айниқса Болаларни зўравонликнинг барча шаклларидан ҳимоя қилиш тўғрисидаги қонун қабул қилингани туфайли амалга ошди”, дея ёзди Шаҳноза Мирзиёева ўз саҳифасида.
Унга кўра, қизнинг хавфсизлигини таъминлаш мақсадида у вақтинча оилавий болалар уйига жойлаштирилди. Комплекс баҳолаш натижасида онаси қарамоғига топширилди. Ҳозирда у доимий ҳимоя остида бўлиб, тикланиш жараёнидан ўтмоқда. Унга тиббий, психологик ва ижтимоий ёрдам кўрсатилмоқда.
