Навоий вилоятида 3 нафар банкоматни ўғирлаб кетган шахслар қўлга олинди. Бу ҳақда вилоят ИИБ матбуот хизмати хабар қилди.
Билдирилишича, жорий йилнинг 4 августидан 5 августга ўтар кечаси қўлига тиббиёт қўлқоплари ва юзларига ниқоб таққан 2000, 2002 ва 2004 йилларда туғилган шахслар давлат рақами мавжуд бўлмаган машинада “Тараққиёт” МФЙда жойлашган банкоматни ўғирлаб кетган.
Ушбу пул жўнатиш қурилмасида 5 миллион 263 минг сўм пул маблағлари бўлган. Олиб борилган тезкор қидирув ишлари натижасида 3 нафар гумонланувчи навбатдаги ўғриликни амалга оширмоқчи бўлаётган пайтларида қўлга олинган.
Мазкур ҳолатда давлат манфаатларига 36 миллион 763 минг сўм миқдорида зарар етказилгани аниқланди.
Гумонланувчиларга нисбатан Жиноят кодексининг тегишли моддалари билан жиноят иши қўзғатилиб, айни пайтда тергов ҳаракатлари олиб борилмоқда.
