Россия Сурия ҳукумати билан мамлакат ҳудудида жойлашган ҳарбий объектлар фаолиятини қайта кўриб чиқиш бўйича музокаралар олиб бормоқда. Бу ҳақда Россия Ташқи ишлар вазирлиги маълум қилди.
Гап Россиянинг Тартус ҳарбий-денгиз базаси ҳамда Хмеймим авиабазасининг келажакдаги мақоми ҳақида кетмоқда. Мазкур объектлар тақдири бўйича саволлар 2024 йил декабрь ойида Россиянинг яқин иттифоқчиси бўлган Башар Асад ҳокимиятдан ағдарилганидан кейин янада кучайган эди.
Амалдаги Сурия Президенти Аҳмад аш-Шараа раҳбарлигидаги янги ҳукумат Москва билан ҳамкорликни давом эттиришга тайёр эканини билдирган. Шу билан бирга, расмий Дамашқ Россия ҳудудида бўлиб турган Башар Асадни мамлакатга топшириш масаласини ҳам кўтармоқда.
Россия Ташқи ишлар вазирлигининг расмий вакили Мария Захарова навбатдаги брифингда Сурия билан мулоқотлар “жуда фаол суръатларда” давом этаётганини таъкидлади. Унинг сўзларига кўра, Россиянинг Суриядаги ҳарбий иштироки ва ҳарбий объектларининг вазифаларини ўзгартириш эҳтимоли ҳам музокаралар кун тартибидан ўрин олган.
"Суриянинг халқаро ҳамкорлари билан алоқалари доирасида Россиянинг ушбу мамлакатдаги ҳарбий иштироки масаласи муҳокама қилинмоқда. Шунингдек, Россия ҳарбий объектларининг вазифаларини эҳтимолий қайта кўриб чиқиш масаласи ҳам кўриб чиқиляпти", деди Захарова.
Бироқ Россия Ташқи ишлар вазирлиги вакили эҳтимолий ўзгаришларнинг мазмуни ёки муддатлари ҳақида аниқ маълумот бермади.
Маълумот учун, Россия Суриядаги ҳарбий базалари тақдирини муҳокама қилмоқда
