Халқаро футбол федерацияси (ФИФА) Жаҳон чемпионати-2026да иштирок этадиган футболчилар учун клубларга 355 миллион доллар миқдорида компенсация тўлашини маълум қилди. Бу сумма тарихдаги энг каттаси ҳисобланади.
ФИФАнинг расмий сайтида қайд этилишича, маблағ “Club Benefits Programme” дастури доирасида тақсимланади. Энди клублар футболчиларини нафақат финал босқичи, балки саралаш ўйинларига юборгани учун ҳам пул ишлаб олади.
Маълумот учун, аввалги турнирларда клубларга тўланган маблағ анча кам бўлган: 2022 йилда — 209 млн доллар, 2018 йилда — 209 млн, 2014 йилда — 70 млн, 2010 йилда эса — 40 миллион доллар.
ЖЧ-2026 АҚШ, Канада ва Мексикада 11 июндан 19 июлгача ўтказилади. Мусобақада илк бор Ўзбекистон терма жамоаси ҳам иштирок этади.
