Индонезия ҳукумати исроиллик спортчиларга Жакартада бўлиб ўтадиган гимнастика бўйича Жаҳон чемпионатида иштирок этиш учун виза беришдан бош тортди. Мамлакатнинг ҳуқуқ ва инсон ҳуқуқлари бўйича мувофиқлаштирувчи вазири Юсрил Ихза Махендра буни тасдиқлади. Бу ҳақда “Арабнеwс” нашри хабар берди.
Вазирнинг сўзларига кўра, ҳукуматнинг бу қарори Индонезиянинг Фаластинни қўллаб-қувватлаш сиёсатига асосланган.
“Индонезия ҳукумати Исроил эркин ва суверен Фаластин давлатини тан олмагунча, у билан ҳеч қандай алоқада бўлмайди”, деди Махендра.
Гимнастика бўйича Жаҳон чемпионати жорий йилнинг 19-25 октябрь кунлари Индонезияда ўтказилиши режалаштирилган. Мусобақада 79 давлатдан 500 дан ортиқ спортчи иштирок этиши кутилмоқда.
Иммиграция вазири Агус Андриантонинг сўзларига кўра, исроиллик спортчиларга виза берилмаслиги Индонезия гимнастика федерациясининг расмий илтимосига биноан амалга оширилган. У бу қарорни тасдиқлаган, бироқ қўшимча изоҳ бермаган.
Индонезия ва Исроил ўртасида расмий дипломатик алоқалар мавжуд эмас. Шу сабабли, Исроил фуқаролари мамлакатга фақат алоҳида рухсат асосида, қисқа муддатга кира олади.
