Америка ва Исроил ҳужумларидан сўнг Эрон ўз ерости бункерлари ва ракета шахталарини бир неча соат ичида тикламоқда. Бу ҳақда АҚШ разведкаси ҳисоботларига таяниб, “The New York Times” хабар берди.
Ҳисоботда айтилишича, Теҳрон катта миқдорда ракеталар ва мобил учириш қурилмаларини сақлаб қолган. Бу ҳолат ҳарбий кампаниянинг асосий мақсадларидан бири – Эроннинг ракета салоҳиятини йўқ қилиш амалга ошганини шубҳа остига қўяди.
Пентагон Эрон ҳужумлари шиддати пасайганини ва буни Теҳрон арсенали камайиши билан боғлаган, аммо разведка маълумотларига кўра, Эрон уруш давом этса ёки тугасангина босим ўтказиш қобилиятини сақлаш учун кўплаб учириш қурилмаларини бункерлар ва ғорларда яшириб келмоқда.
Ҳисоботда қайд этилишича, Теҳрон қолган баллистик ракеталар ва учириш қурилмаларидан Исроил ва минтақадаги бошқа давлатларга зарба бериш имконини сақлаб турибди. Шу билан бирга, Эрон “ёлғон нишонлар”дан фаол фойдаланмоқда, шу боис АҚШ вайрон қилинган қурилмаларнинг қанчаси ҳақиқийлигини аниқ айта олмайди.
NYT маълумотларига кўра, ҳужумлар шиддати пасайганига қарамай, Эрон Исроил ва АҚШ билан боғлиқ объектларга кунига 15–30 та баллистик ракета ва 50–100 та камикадзе дронларни учиришда давом этмоқда.
