Наманган вилоятининг Чуст туманига хос бўлган машҳур палов — Чуст ошига географик кўрсаткич мақоми берилди. Бу ҳақда Адлия вазирлиги маълум қилди.
Қайд этилишича, Чуст оши нафақат ўзининг бетакрор таъми, балки кўп асрлик ошпазлик анъаналари билан ҳам ажралиб туради. Таомнинг ўзига хослиги ҳудуднинг микроиқлими, шувоқ ва ёввойи ўтлар билан боқилган қора қўчқорлар гўшти ҳамда Ғовасой ва Косонсой ҳавзаларининг юмшоқ булоқ сувлари билан боғлиқ.
Адлия вазирлиги маълумотига кўра, географик кўрсаткич мақоми Чуст оши номи ва унинг анъанавий тайёрлаш технологиясини ҳуқуқий жиҳатдан ҳимоя қилиш имконини беради.
Шунингдек, мазкур мақом маҳсулотнинг белгиланган сифат стандартларига мувофиқлигини тасдиқлаб, ҳудуднинг гастрономик брендини халқаро миқёсда тарғиб қилишга хизмат қилади.
Эслатиб ўтамиз, бундан аввал “Андижон девзира оши” ҳам географик кўрсаткич сифатида давлат реестрига киритилган эди.
