Туркияда сўнгги уч кун ичида тўрт нафар Ўзбекистон фуқаросининг вафот этгани маълум бўлди. Бу ҳақда Ўзбекистоннинг Истанбул шаҳридаги Бош консулхонаси хабар қилди.
Маълум қилинишича, 11 июнь куни Истанбулдаги Шимолий Мармара автомагистралида содир бўлган йўл-транспорт ҳодисаси оқибатида 31 ёшли Ўзбекистон фуқароси, унинг Туркия фуқароси бўлган турмуш ўртоғи ва икки ойлик фарзанди ҳалок бўлган.
Шунингдек, 12 июнь куни Тузла туманида рўй берган яна бир йўл-транспорт ҳодисасида 23 ёшли Ўзбекистон фуқароси оғир тан жароҳатлари оқибатида вафот этган.
13 июнь куни эса Истанбулдаги шифохоналардан бирида узоқ вақт саратон касаллиги билан курашган 58 ёшли Ўзбекистон фуқароси бўлган аёл ҳаётдан кўз юмган.
Бош консулхона марҳумларнинг оила аъзолари ва яқинларига ҳамдардлик билдирган. Қайд этилишича, айни пайтда Миграция агентлиги билан ҳамкорликда жасадларни Ўзбекистонга олиб келиш ва бошқа ташкилий масалалар бўйича зарур консуллик-ҳуқуқий ёрдам кўрсатилмоқда.
