Кеча, 9 октябрь куни Италия сузиш федерацияси (ФИН) икки сузувчи Бенедетта Пилато ва Чиара Тарантинони 90 кунга дисквалификация қилди. Спортчилар Сингапурда косметик маҳсулотлар ўғирлагани учун спортдан вақтинча четлатилди. Бу ҳақда “Раи news” нашри хабар берди.
Маълум қилинишича, улар жорий йилнинг 14 август куни Сингапур аэропортида косметик маҳсулотлар ўғирланиши билан боғлиқ иш бўйича ўз айбларини тан олганидан сўнг, тергов якунланиб, иш расмий равишда ёпилган.
Италия сузиш федерацияси ушбу қарорни Италия миллий олимпия қўмитаси ва Бош прокурорининг розилиги билан, томонлар тақдим этган келишув сўровига биноан қабул қилган. Тергов давомида аниқланган ҳолатлар инобатга олиниб, иккала спортчининг ижтимоий ва федерал фаолиятини 90 кунга тўхтатиш санкцияси кучга киритилган.
Маълум бўлишича, Пилато ва Тарантино 14 август куни жаҳон чемпионатидан кейин таътилдан қайтаётганида Сингапур аэропортида ўғирликда гумонланиб тўхтатилган, бироқ Италия элчихонасининг аралашуви натижасида озод қилинган. Маҳаллий ОАВ хабарларига кўра, кузатув камерасида улардан бирини дўкондан ўғирланган нарсаларни сумкага солаётган видеолар қайд этилган.
