«Севгимни учратдим деганимда йўқотишни истамайман...»

— Коллежни тугатганимдан кейин оилавий шароитимиз туфайли бозорда савдо қила бошладим. Шу ерда бир йигит билан танишиб, уни ёқтириб қолдим. Бу ҳақда ким билан гаплашишни билмай турганимда, ўзи телефон рақамимни топиб, қўнғироқ қилди. Бир неча ой давомида гаплашиб юрдик. Уйимизга совчиларини юбориш ниятида эканлигини айтганида, юрагим қинидан чиқиб кетай деди. Лекин бу ҳақда онамга айтсам, у киши «Қизим, ҳали ёшсан, бунинг устига, биз ҳозир тўй қиладиган шароитда эмасмиз», деди. Совчиларга ҳам шу жавобни айтиб, рад этишди. Улар «Розилик беришмадими, энди бу хонадонга қайтиб қадам босмаймиз», деб кетишибди. Шундан кейин кўнгил қўйган инсоним билан бир неча бор қўнғироқлашдим. У нуқул ота-онамни кўндиришимни сўрарди. Охирги марта суҳбатлашганимизда эса шу кунларда онасининг қистови туфайли бир қиз билан кўришганини, у ёқмаганлигини айтганди. Сиқилиб кетаяпман, ота-онаси бошқа қизга уйлантириб қўйишидан хавотирдаман...

 Зарина, 17 ёш, Навойи вилояти

Қайнонажон: — Агар йигит сизни севса, бир-икки йил кутади. Орзиқиб кутилган ёр қадрли-да барибир. Ота-онангиз жуда тўғри фикр юритишган — сиз ҳали ёшсиз. Ота-она фарзандининг оилага тайёр эканлигига, она бўлиш учун ҳам маънавий, ҳам жисмоний жиҳатдан  етилганига, мустақил ҳаёт остонасига қадам қўйиб бахтиёр яшай олишига кўзи етсагина, турмушга узатишади. Ахир жигарбандининг тўй-томошасини кўриб, қувончларга  тўлишни ким ҳам истамайди, дейсиз?! Ҳар бир ишнинг вақт-соати бор, болажоним. Шошилган қиз эрдан ёлчимас, дейди халқимиз. Турмуш масаласида ҳеч қачон шошилманг, катталар нима десалар, уларнинг маслаҳати ва розилиги билан қадам босинг, албатта, бахтли бўласиз. Ақлли, сабр-бардошли, ўз ҳақ-ҳуқуқи ва қадр-қимматини қадрлайдиган қиз бўлишингизни тилаб қоламиз.

Шаҳноза ХАЛИЛОВА, руҳшунос: —  Қиз боланинг остонасини супуриб келган аёллар бундай қўпол сўзларни айтишлари шу хонадон эгалари ва қизга нисбатан одобсизлик, назаримда. Шундан кейин ҳам улар ўзи қандай инсонлар экан, деган савол сизни ўйлантирмадими? Ахир оила икки инсоннинг муҳаббатидангина иборат эмас. Уларнинг ота-оналари, қариндош-уруғлари ҳам ёшларнинг ҳаётига ўз таъсирини ўтказишлари бор гап. Агар йигитнинг муҳаббати шу кичик синовдан ўта олмаган экан, турмушнинг улкан қийинчиликлари қаршисида қандай йўл тутишини ўзингиз тасаввур қилиб кўришингиз мумкин. Азму қарорида қатъий турмайдиган йигитдан яхши турмуш ўртоқ чиқиши даргумон. Йигитни ҳаддан ташқари идеаллаштириб юбормасликни маслаҳат бераман.