“Бугун биз Жаҳон чемпионатидаги иштирокимизни якунладик. Шу билан бирга, 3 йил давомида юрагим билан хизмат қилган U-17 терма жамоам билан фаолиятим ҳам ниҳоясига етди. Бу йўл мен учун шунчаки иш эмас — шараф, масъулият ва Аллоҳнинг синови бўлди. Уч йил давомида машаққатли машғулотлар, қувончли ғалабалар ва оғир мағлубиятлар билан бирга бўлдик. Яхши кунларда ҳам, ёмон кунларда ҳам жамоам билан елкадош эдим", — деб ёзди мураббий.
“Осиё чемпионлиги — олтин ҳарфлар билан ёзиладиган ютуқ”
Исмоилов шу йил апрель ойида қўлга киритилган Осиё чемпионлигини жамоа меҳнати ва авлод жасорати деб атади.
“2025 йилда Осиё чемпиони бўлиш — болаларимизнинг жасорати ва интилиши. Бу натижа Ўзбекистон футболи тарихига олтин ҳарфлар билан ёзилди. Ҳар бир машғулотда, ҳар бир ўйинда биз байроғимизнинг шаънини ҳимоя қилдик. Ҳар бир баҳс олдидан битта фикр бор эди: бу Ватан учун жон фидо”, — деб таъкидлади у.
“Адолат ва ҳалоллик — менинг асосий қоидам эди”
Мураббий ўз фолияти давомида танлов фақат меҳнат ва хислатга қараб амалга оширилганини урғулади.
“Ҳеч кимнинг исмини, клубини ёки таниш-билишчилигини эмас, фақат меҳнатини, феъл-атворини ва муносиблигини танладим. Терма жамоага чақирилган ҳар бир футболчи бу ҳаққа эга эди. Қарорларим учун бугун ҳам, эртага ҳам бошим баланд”, — деди Исмоилов.
“Бу якун эмас — янги босқичнинг бошланиши”
Мураббий ўзини қўллаб-қувватлаган мухлисларга, ЎФА раҳбариятига, ёрдамчиларига ва футболчиларга миннатдорлик билдирди.
“Бу якун — бир эшикнинг ёпилиши эмас. Бу янги босқичнинг бошланиши. Бугун менинг йўлим бу жамоа билан тугади”, — дея хотималади Исмоилов.
