Тошкент шаҳрининг Миробод туманида қурилаётган бинода ёнғин содир бўлди. Бу ҳақда Тошкент шаҳар Фавқулодда вазиятлар бош бошқармаси хабар берди.
Маълум қилинишича, бугун, 12 июнь куни соат 16:21 да Миробод тумани Содиқ Азимов кўчасида жойлашган янги қурилаётган бинода қурилиш материаллари ёнаётгани тўғрисида ФВББга хабар келиб тушган.
Хабарга асосан, ёнғин-қутқарув экипажлари воқеа жойига соат 16:28 да етиб борган ва ёнғинни бартараф этиш ишларини бошлаган.
Фавқулодда вазиятлар хизмати маълумотига кўра, ёнғин соат 16:35 да қуршаб олинган.
Қайд этилишича, вазият Тошкент шаҳар Фавқулодда вазиятлар бош бошқармаси томонидан тўлиқ назоратга олинган. Ҳодиса оқибатлари ҳамда жабрланганлар ҳақида ҳозирча маълумот берилмаган.
Мазкур ҳолат юзасидан қўшимча ахборот тақдим этилиши айтилмоқда.
