Андижон вилоятида ичимлик сувидан аниқланган зарар миқдорини камайтириб беришни ваъда қилган шахслар фош этилди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Қайд этилишича, Департаментнинг Булоқбоши тумани бўлими ҳамда бошқа ҳуқуқни муҳофаза қилувчи органлар ходимлари томонидан тадбиркорлик субъектларининг ҳуқуқий ҳимоясини таъминлаш юзасидан тезкор тадбир ўтказилган.
Тадбир давомида Андижон вилояти ҳудудий Қурилиш ва уй-жой коммунал хўжалиги соҳасида назорат қилиш инспекциясининг давлат муассасаси шўъбаси бошлиғи Ш.Ж. ва бошқа шахслар ўзаро тил бириктиргани аниқланган.
Терговга қадар текширув материалларига кўра, улар “В.О.” МЧЖ раҳбари Х.Н.нинг Андижон шаҳридаги савдо дўконида ичимлик сувидан ноқонуний фойдаланиш ҳолати бўйича ҳисобланган 679,2 миллион сўмлик зарарни гўёки “Андижон сув таъминоти” АЖда ишловчи танишлари орқали қайта ҳисоб-китоб қилдириб, камайтириб беришни ваъда қилган.
Улар мазкур хизмат эвазига 30 миллион сўм олган вақтда ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ҳамда 28, 211-моддалари (пора беришга далолат қилиш) билан жиноят иши қўзғатилган.
Ҳозирда ҳолат юзасидан тергов ҳаракатлари олиб борилмоқда.
