13 июнь куни футбол бўйича 2026 йилги Жаҳон чемпионатининг “B” гуруҳидан ўрин олган Канада ва Босния ва Герцеговина терма жамоалари ўртасидаги 1-тур учрашуви бўлиб ўтди. Торонтодаги “БМО Филд” стадионида кечган баҳс 1:1 ҳисобидаги дуранг билан якунланди.
Аргентиналик ҳакам Факундо Тельо бошқариб борган учрашувда ҳисоб 21-дақиқада очилди. Босния ва Герцеговина ҳужумчиси Йово Лукич рақиб дарвозасини ишғол қилиб, жамоасини олдинга олиб чиқди.
Учрашувнинг иккинчи бўлимида канадалик ҳужумчи Кайл Ларин 79-дақиқада ҳисобни тенглаштирди ва жамоасини мағлубиятдан қутқариб қолди.
Баҳснинг 84-дақиқасида Босния ва Герцеговина терма жамоаси сардори Сеад Колашинац жароҳат олиб, майдонни тарк этишга мажбур бўлди.
Мазкур дуранг орқали Канада терма жамоаси Жаҳон чемпионатлари тарихидаги илк очкосини қўлга киритди.
Натижадан сўнг ҳар икки жамоа ҳисобида бир очкодан мавжуд бўлиб, гуруҳ жадвалида етакчи ўринларни эгаллаб турибди. Гуруҳнинг яна бир учрашувида 13 июнь куни тунда Қатар ва Швейцария терма жамоалари ўзаро баҳс олиб боради.
Канада кейинги турда 19 июнь куни Қатарга қарши майдонга тушади, 24 июнь куни эса Швейцария билан куч синашади. Босния ва Герцеговина эса 18 июнь куни Швейцарияга қарши ўйнайди, 24 июнь куни эса Қатар билан баҳс олиб боради.
