Шавкат Мирзиёев соғлиқни сақлаш тизимини янада ривожлантиришга оид тақдимот билан танишди. Унда аҳолига замонавий тиббий хизмат кўрсатиш, бошқарув самарадорлигини ошириш ва хусусий сектор иштирокини кенгайтириш масалалари муҳокама қилинди.
Маълум қилинишича, сўнгги йилларда хусусий клиникалар сони сезиларли ошган: 2016-йилда 3,2 мингта бўлган муассасалар 2026-йилга келиб 8,7 мингтага етиши кутилмоқда. Шу билан бирга, соҳада назорат механизмлари етарли эмаслиги, лицензиялаш талаблари замонга мос эмаслиги каби муаммолар ҳам қайд этилди.
Тақдимотда тиббий фаолиятни лицензиялаш тартибини кучайтириш, назоратни электрон тизим орқали амалга ошириш, шунингдек, хусусий клиникаларга бюджет маблағлари ҳисобидан хизмат кўрсатиш имконини бериш таклиф қилинди. Аккредитатсиядан ўтган хусусий муассасаларга трансплантация билан шуғулланишга рухсат бериш ҳам режалаштирилмоқда.
Шунингдек, 2030-йилга қадар барча давлат тиббиёт муассасаларини босқичма-босқич мажбурий лицензиялаш, олис ҳудудларда клиникалар ташкил этиш учун имтиёзли кредитлар ажратиш ва хорижий мутахассислар учун солиқ имтиёзлари жорий этиш кўзда тутилган.
Соҳага инвестицияларни жалб қилиш мақсадида Тиббиёт ва фармацевтика тармоғини ривожлантириш агентлигини ташкил этиш, шунингдек, “Health Invest” компаниясини йўлга қўйиш таклиф этилди.
Давлат раҳбари тақдим этилган таклифларни маъқуллаб, масъулларга уларни амалга ошириш бўйича топшириқлар берди.
