Ижтимоий тармоқларда тарқалган видеода бир нечта бола Nexia-2 автомобили устида ҳаракат давомида рақсга тушаётгани акс этган эди. Тошкент шаҳар ИИББ маълум қилишича, ҳодиса 26 апрель куни тунги соат 02:00 атрофида Юнусобод туманидаги йўл чорраҳаларида содир бўлган.
Аниқланишича, ҳайдовчи ўсмирларнинг хавфли ҳаракатларига йўл қўйиш билан бирга, баланд овозли мусиқани ҳам ёққан. Унга нисбатан Маъмурий жавобгарлик тўғрисидаги кодекснинг тегишли моддаси асосида баённома расмийлаштирилиб, автомашина жарима майдончасига жўнатилган.
Шунингдек, ўсмирлар Сурхондарё вилоятидан экани ва Тошкентда ота-она ҳамроҳлигисиз бўлгани маълум бўлди. Улар вояга етмаганларга ижтимоий-ҳуқуқий ёрдам кўрсатиш марказига жойлаштирилган. Ота-оналарига нисбатан ҳам тегишли тартибда маъмурий чора кўрилган.
