Лотин ёзувига асосланган ўзбек алифбосини такомиллаштиришга қаратилган қонун лойиҳаси Олий Мажлис Қонунчилик палатаси депутатлари томонидан қабул қилиниб, Сенатга юборилди.
Ҳужжатга кўра, амалдаги 26 та ҳарф ва 3 та ҳарф бирикмасидан иборат алифбо ўрнига 28 та ҳарф ва 1 та тутуқ белгисидан ташкил топган янги алифбо жорий этилиши таклиф этилмоқда. Шунингдек, айрим ҳарфларнинг қўлланилишига аниқлик киритилиши назарда тутилган.
Янги таҳрирда икки белгидан иборат ҳарф бирикмалари бекор қилиниб, улар битта белги билан ифодаланади. Хусусан, "Sh" ўрнига "Ş", "Ch" ўрнига "Ç", "Oʻ" ўрнига "Ö", "Gʻ" ўрнига "Ğ" ҳарфларини қўллаш таклиф этилган. Шу билан бирга, "Ng" ҳарф бирикмасидан воз кечиш режалаштирилмоқда.
Муҳокамалар давомида депутатлар қонунни босқичма-босқич амалга ошириш бўйича таклифлар ҳам билдирди. Жумладан, қонун кучга киргунга қадар расмийлаштирилган ҳужжатлар, миллий валюта, қимматли қоғозлар, давлат органлари ва ташкилотларининг пешлавҳалари, рамзий белгилари ҳамда бошқа атрибутлар белгиланган муддатгача амал қилишда давом этади.
Қайд этилишича, бундай ёндашув давлат муассасаларидаги ҳужжатлар, бланкалар, кўрсаткичлар ва бошқа воситаларни бир вақтнинг ўзида алмаштириш заруратини бартараф этади. Бу эса давлат бюджети маблағларининг ортиқча сарфланишининг олдини олишга хизмат қилади.
Мазкур қонун лойиҳасини ишлаб чиқишда Ўзбекистон Фанлар академияси Ўзбек тили, адабиёти ва фольклори институти олимлари ҳам иштирок этган.
Эслатиб ўтамиз, мазкур қонун лойиҳаси илк бор 2021 йил март ойида жамоатчилик муҳокамасига қўйилган эди. 2023 йил сентябрида эса ишчи гуруҳ алифбонинг янгиланган лойиҳасини тақдим этган.
